Umupolisikazi abaye uwa kabiri wishwe na COVID-19 mu Rwanda

Nyuma y’iminsi ibiri gusa hatangajwe umuntu wa mbere wahitanywe n’Icyorezo cya COVID-19, Mu ijoro rishyira ku wa Gatatu tariki ya 3 Kamena 2020, Minisiteri y’Ubuzima yatangaje umurwayi wa kabiri wapfuye azize icyo cyorezo.

Umurwayi wa mbere watangajwe tariki ya ya 30 Gicurasi 2020, yari umushoferi w’Umunyarwanda w’imyaka 65 wari utuye mu gihugu cy’abaturanyi akaba yarahisemo gutaha mu Rwanda nyuma yo kuremba.

Uwatangajwe kuri uyu munsi we yari umupolisikazi w’imyaka 24 y’amavuko wari mu butumwa bw’akazi mu mahanga aho yanduriye Koronavirusi aza kugarurwa mu Rwanda amaze kuremba.

Yahise yitabwaho n’abaganga ashiramo umwuka azize uburwayi bukomeye.

Uwo mupolisikazi wahitanywe n’icyorezo cya COVID-19 yatangajwe hamwe n’abandi bantu 7 bashya batahuweho ubwo burwayi mu bipimo 957 byafashwe mu masaha 24 ashize, hataha abandi 7 bakize neza.

Byatumye umubare w’abamaze gukira COVID-19 ugera kuri 269 muri 384 bamaze gutahurwaho icyo cyorezo mu Rwanda.

Minisiteri y’Ubuzima ivuga ko umubare w’abakirimo kwitabwaho n’abaganga ari 113, mu barwayi bose bamaze kuboneka mu bipimo 70,108 byafashwe kuva umurwayi wa mbere yatahurwa muri Werurwe kugeza ubu.

Abarwayi bashya bose bahise bashyirwa mu kato bakihagera, ndetse n’abakirwaye muri rusange bakomeje kuvurirwa ahabugenewe.

Igikorwa cyo gupima abantu mu buryo bwa rusange mu Gihugu kirakomeje, mu minsi ibiri ishize hakaba harabonetse ubwandu bushya mu Karere ka Rusizi gahana imbibe n’Igihugu cya Repubulika Iharanira Demokarasi ya Congo.

Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze ku 136,677 barimo 56,958 bakize n’abandi 3,941bahitanywe na cyo. Abamaze kwandura ku Isi bangana na 6,470,285 barimo abakize 2,984,522 na 381,624 bapfuye.

MUHABURA.RW