Tanzania: Perezida Magufuli yamaganye urukingo rwa covid-19 mu gihugu cye

Prezida wa Tanzania John Pombe Magufuli yatangaje ko abantu bava mu bihugu by’amahanga bavuye kwikingiza covid-19 aribo bazana iyo ndwara mu gihigu aburira abashinzwe ubuzima bw’abantu ko batakwihutira kuzana inkingo za Covid-19 kuko zishobora kubangamira ubuzima bw’abaturage.

Ibi Perezida Magufuli yabigarutseho
ubwo yarimo afungura igikorwa cyo gutera ibiti mu ishyamba ryo mu karere ka Chato Aho avuka mu ntara ya Geita.

Hari hashize Umwaka Perezida Magufuli atangaje ko nta covid-19 iri mu gihugu cye ariko kuri uyu wa Gatatu Tariki 27 Mutarama 2021 yatangaje ko yahageze ariko yazanwe n’abantu bava hanze babeshya ko Bafashe urukingo.

Yanenze izi nkingo zikomeje kugenda zitangwa hirya no hino ku isi ahera Aho asaba abashinzwe ubuzima kwitondera kwakira izo nkingo.

Magufuli yagize ati:”Minisitiri w’ubuzima akwiriye kwitonda, bashobora kwirukira izo nkingo hadakozwe ubushakashatsi.Si buri nkingo zose ziba nziza kuri twebwe, dukwiriye kwibyitondera. “

Perezida Magufuli yasabye Abatanzania gushikama bagasenga ntabyo kwiringira Inkingo ndetse anabashishikariza gukomeza kwihaza.

Ati “Dukomeze gusenga …..mu gihe dukomeza n’akazi ka buri munsi, murye neza muhage Corona inanirwe kwinjira mu mibiri yanyu.”

Ku byerekeye ubundi bwoko bwa Corona, Magufuli yavuze ko hariho abanya Tanzania bajya kwikingiza hanze y’igihugu ariko bakagaruka bazanye ubundi bwoko bwa Corona.

Prezida Magufuli yagize ati:”Ndabizi ko hariho abanya Tanzania bamwe na bamwe bavuye muri iki gihugu bagiye hanze kwikingiza, barangije bagaruka batuzaniye iyindi Corona y’ubundi bwoko. “

“Ntitujye turirukira inkingo, si buri rukingo rutugirira akamaro, ni ngombwa ko aba Tanzania tuba maso, twirinde,dukomeze gusenga Imana yacu …..”

Icyakora,Kiliziya Gatolika muri Tanzania yasabye abayoboke bayo gushyiraho ingamba zo kwirinda icyorezo cya Coronavirus gikomeje kwiyongera, mu gihe leta ihamya ko iki cyorezo cyitakirangwa muri iki gihugu.

Perezida w’akanama k’abepiskopi muri Tanzania, Musenyeri Gervas Nyaisonga, mu ibaruwa igenewe abakiristu yavuze ko Kiliziya yasanze imibare y’abitaba Imana muri iki gihugu iri kwiyongera, bityo ko bishoboka ko abo bantu bari guhitanwa na Coronavirus.

Yavuze ko abantu bagomba kubahiriza ingamba zo kwirinda Coronavirus kandi bagasenga Imana ikabakiza iki cyorezo, nkuko BBC yabitangaje.

Ati “Igihugu cyacu si ikirwa, niyo mpamvu tugomba gushyiraho ingamba zose zo kwirinda icyorezo kandi tugasenga Imana ikakidukiza”.

Minisitiri w’ubuzima wungirije muri Tanzania, Dr Goodluck Mollel yavuze ko abaturage bakwiye gutegereza ibyemezo bya guverinoma aho kurangazwa n’itangazo rya Kiliziya Gatolika.

Ati ”Tugomba kubirekera abahanga muri siyansi. Haramutse hari ikibazo leta yabisobanura. Abaturage barasabwa gukomeza ibikorwa byabo bibateza imbere”.

Mu cyumweru gishize u Bwongereza bwafashe umwanzuro wo gukumira abagenzi bava muri Tanzania no muri Repubulika iharanira Demokarasi ya Congo kuko ibi bihugu bitafashe ingamba zikomeye zo guhashya Coronavirus.