Senegal na Tunisia nabyo byatangaje umurwayi wa mbere wa coronavirus

  • admin
  • 03/03/2020
  • Hashize 4 years

Umuntu wa mbere wanduye coronavirus yaraye atangajwe muri Sénégal, nkuko byemejwe na Abdoulaye Diouf Sarr, Minisitiri w’ubuzima w’iki gihugu.

Uwo murwayi ni Umufaransa w’umugabo uba muri Sénégal, wasubiye muri Sénégal avuye mu Bufaransa ku itariki ya 26 y’ukwezi gushize kwa kabiri, nkuko Bwana Sarr yabivugiye mu kiganiro n’abanyamakuru mu murwa mukuru Dakar.

Uwo murwayi yageze ku bitaro byigenga ku itariki ya 27 y’ukwezi kwa kabiri agaragaza ibimenyetso bya coronavirus birimo kurwara umutwe.

Abategetsi muri Sénégal bari kugenzura buri muntu wese waje mu ndege imwe n’uwo mugabo ndetse n’abo mu muryango we.

Minisitiri w’ubuzima yavuze ko iki gihugu cyiteguye guhangana n’iyi virusi, avuga ko gifite n’ibikoresho bya ngombwa byo kuyipima.

Uyu abaye umuntu wa kabiri wo muri Afurika yo munsi y’ubutayu bwa Sahara wemejwe ko yanduye ubu bwoko bushya bwa coronavirus, nyuma y’uwatangajwe muri Nigeria mu cyumweru gishize.

Igihugu cya Tunisia nacyo cyatangaje umuntu wa mbere wanduye coronavirus, nkuko minisitiri w’ubuzima w’icyo gihugu yabibwiye abanyamakuru ku munsi w’ejo ku wa mbere.

Minisitiri w’ubuzima Abdelatif el-Maki yavuze ko uwo murwayi ari umugabo wo muri Tunisia w’imyaka 40, wageze mu gihugu n’ubwato avuye mu Butaliyani ku itariki ya 27 y’ukwa kabiri.

We n’abandi bagenzi bari bagiriwe inama yo kugenzurana. Ubwo umuriro we wazamukaga, yabimenyesheje inzego z’ubutabazi bwihuse.

Muri Afurika, byiyongera kuri Tunisia na Sénégal, Algeria, Misiri na Nigeria nabyo byemeje umuntu wa mbere wanduye coronavirus.

Niyomugabo Albert

  • admin
  • 03/03/2020
  • Hashize 4 years