Rwanda: Volleyball: Gisagara VC na APR VC ni zo zegukanye Forzza VBT 2021

Mu mpera z’ icyumweru gishize  taliki 05 na 06 Gashyantare 2022   ni bwo hakinwe  imikino y’icyiciro cya 5 (Phase 5) ari nayo yasoje  irushanwa ryateguwe na Kompanyi ya “Forzza Bet” ikora ibijyanye no gutega ku mikino itandukanye “Forzza Volleyball Tournament 2021”.

Ikipe ya Gisagara VC mu bagabo  yegukanye ibyiciro bitatu na APR VC mu bagore  yegukanye ibyiciro bibiri ni zo zegukanye  igikombe.

Mu mikino y’icyiciro cya 5 yabereye kuri Sitade Amahoro, mu bagabo nyuma y’imikino y’amajonjora, ikipe ya REG VC ni yo yitwaye neza yegukana umwanya wa mbere aho yatsinze Gisagara VC amaseti 3-1 (24-26, 25-16, 26-24 na 25-17).

Ikipe ya REG VC yari yageze ku mukino wa nyuma isezereye Kirehe VC  muri ½  ku maseti 3-0 (25-18,25-23 na 25-16) naho Gisagara VC isezerera  UVC ku maseti 3-1 (27-25, 19-25, 25-21 na 25-19).

Mu guhatanira umwanya wa 3, ikipe ya UVC yatsinze Kirehe VC amaseti 3-0 (25-20, 25-19 na 25-22).

REG VC yasoreje ku mwanya wa mbere n’amanota 8, ikurikirwa na Gisagara VC (7), UVC (6), Kirehe VC (5), APR VC (4), IPRC Ngoma (3), IPRC Musanze (2) na KVC (1).

Muri rusange nyuma y’ibyciro 5, Gisagara VC ni yo yegukanye iri rushanwa aho yegukanye ibyiciro 3 isoza ifite amanota 37, ku mwanya wa kabiri haje REG VC yegukanye ibyiciro 2 n’amanota 30 naho ku mwanya wa 3 haza ikipe UVC na yo n’amanota 30. Ku mwanya wa 4 hasoreje Kirehe VC n’amanota 21, ikurikirwa na IPRC Ngoma (20), APR VC (20), IPRC Musanze (10) na KVC (6).

Umutoza mukuru w’ikipe ya Gisagara VC, Ndahiro Joseph yatangaje ko bishimiye kwegukana iki gikombe n’ubwo ibyiciro 2 bya nyuma batabashije kubyegukana.

Aha avuga ko  nyuma yo gutsinda ibyiciro bitatu bibanza abakinnyi be bahise bizera igikombe bityo rero mu bindi  bice batashyizemo imbagara nk’iza mbere.

Mu bagore, ikipe ya RRA VC yegukanye icyiciro cya 5 aho yatsinze ku mukino wa nyuma ikipe ya APR VC amaseti 3-1 (25-23, 25-15, 23-25 na 25-15).

Iyi kipe ya RRA VC yari yageze ku mukino wa nyuma isezereye UVC ku maseti 3-2 ( 25-19,24-26,17-25, 25-12 na 15-12) naho APR VC isezerera ikipe ya IPRC Kigali ku maseti 3-0 (25-16, 25-20 na 25-13).

Mu guhatanira umwanya wa 3, ikipe ya UVC yitwaye neza itsinda IPRC Kigali amaseti 3-0 (25-17, 25-15 na 25-19).

Ikipe ya RRA VC yasoreje ku mwanya wa mbere n’amanota 8 ikurikirwa na APR VC (7), UVC (6), IPRC Kigali (5), Ruhango VC (4), IPRC Huye (3), GS S^t Aloys (2) na KVC (0).

Muri rusange nyuma y’ibyiciro 5, ikipe ya APR VC ni yo yegukanye irushanwa aho yasoreje ku mwanya wa mbere n’amanota 36 aho yegukanye ibyiciro 2, ku mwanya wa kabiri  hasoreje  UVC m’amanota 35 na yo ikaba yaregukanye ibyiciro 2 na ho ku mwanya wa 3 haza ikipe ya  RRA VC n’amanota 34 aho yegukanye icyiciro cya nyuma.

Ku mwanya wa 5 haje ikipe ya IPRC Kigali (23), Ruhango VC (20), IPRC Huye (11), GS St Aloys Rwamagana (5) na KVC (5).

Umutoza wa APR VC, Siborurema Florien yatangaje ko  irushanwa ryabanje kubagora kuko ryagiye risubikwa kubera COVID-19  ariko yishimira ko intego yo kwegukana igikombe bari bihaye  bayigezeho.

Amakipe n’abakinnyi bitwaye neza bahawe ibihembo

Mu bagabo, ikipe ya Gisagara VC yahawe igikombe na miliyoni 2 z’amafaranga y’u Rwanda, REG VC ihabwa miliyoni 1.5 naho ikipe ya UVC ihabwa miliyoni 1.

Mu bagore,  APR VC yahawe igikombe na miliyoni 2, UVC ihabwa miliyoni 1.5 naho ikipe ya RRA VC ihabwa miliyoni 1.

APR VC (1)

Abakinnyi bahize abandi mu bagabo, uwahaye imipira bagenzi be “Best setter” yabaye Ndayisaba Sylvestre (Gisagara VC),  uwateye  neza imipira ya mbere mu kibuga cy’ikipe bahanganye “Best Server” yabaye Mukunzi Gasarasi Christophe (APR  VC), uwagaruye imipira neza “Best Receiver” aba  Ntagengwa Olivier (UVC), uwatsinze kurusha abandi “Best Attacker” aba  Niyogisubizo Samuel (Gisagara VC), uwazibiye imipira kurusha abandi “Best Blocker” aba  Twagirayezu Emmy (REG), Libero aba Rwigema Simon (REG) naho umukinnyi witwaye neza mu irushanwa ryose “MVP” aba Malinga Kathbart (Gisagara VC).

Mu bagore,  uwahaye imipira bagenzi be “Best setter” yabaye Akimanizanye Ernestine (RRA), uwateye  neza imipira ya mbere mu kibuga cy’ikipe bahanganye “Best Server” aba Bayija Yvonne (APR VB), uwagaruye imipira neza “Best Receiver” aba Nzamukosha Oliva (RRA), uwatsinze kurusha abandi “Best Attacker” aba Mukantambara Seraphine (APR VB), uwazibiye imipira kurusha abandi “Best Blocker”  yabaye Malinda Sharon (UVC),Libero aba Uwamahoro Beatrice Betty (RRA) naho umukinnyi witwaye neza mu irushanwa ryose aba Mukandayisenga Benitha (UVC).

Iri rushanwa “Forzza Volleyball Tournament 2021” ryatangiye taliki 11 Ukuboza 2021 risozwa taliki 06 Gashyatare 2022. Umuyobozi wa Forzza Bet, Rutayisire Eric yatangaje ko bishiiye uko irushanwa ryagenze. Ati : “Irushanwa muri rusange ryagenze neza, mbere twari twatangiye  biteganyijwe ko rizakinwa mu byiciro 4 nyuma biza kuba  5  kandi  byarushijeho kuryosha irushanwa.”

Yakomeje avuga ko  Forzza Bet ari umufatanyabikorwa  wa FRVB ko n’ibindi bikorwa ndetse n’amarushanwa  biteganyijwe bazagerageza kubitera inkunga uko bashoboye.