RDC:Nyuma y’imyaka ibiri atorotse,umuyobozi w’umutwe wa politiki ushingiye kw’idini yongeye gutabwa muri yombi

Umuyobozi w’umutwe wa politiki ushingiye kw’idini, uharanira ukwitandukanya kw’amajyepfo ashyira uburengerazuba bwa Repuburika iharanira demokarasi ya Congo, yatawe muri yombi nyuma y’iminsi ibiri amaze kwongera kwigaragaza.

Yari yaratorokanye n’izindi mfungwa mu myaka ibiri ishize. Ifatwa rye ryatangajwe na polise kuri uyu wa gatanu.

Ne Muanda Nsemi, umuyobozi wa muvoma yitwa Bundu dia Kongo cyangwa Bundu dia Mayala bivuze ubwami bwa Kongo, yasubijwe muri gereza ya Malaka mw’ijoro ryo kuri uyu wa kane, aherekejwe na polise. Umuvugizi wa polise Coloneli Pierrot-Rumbaut Mwanamputu, yabibwiye ibiro ntaramakuru by’abafaransa AFP. Yavugaga gereza nkuru ya Kinshasa.

Iyo muvoma, Nsemi ayoboye, yiganje mu majyepfo ashyira uburengerazuba bwa Congo. Ishaka gusubizaho imbago z’ubwami bwahozeho mbere y’ubukoloni. Harimo ibice by’ibihugu bya Angola, Congo na Gabon.

Ne Muanda Nsemi, yatorotse gereza ya Malaka mu kwezi kwa 5 umwaka wa 2017, mu gitero cyabaye mu rukererera. Byatumye abagororwa barenga 4,000 babasha gutoroka.

Kuva icyo gihe yakomeje kwihishahisha. Muri iki cyumweru nibwo yabonetse kuri televisiyo.

Uwo muyobozi mu rwego rw’idini, yaregwaga na guverinema y’uwahoze ari perezida Joseph Kabila, kugaba ibitero byo gusenya inzego z’ubuyobozi. Harihagati mu mpera z’umwaka wa 2016 n’uwa 2017.

Zacharie Badiengila uzwi nka Ne Muanda Nsemi ni uwo wambaye ishati y’ubururu
Yandditswe na Habarurema Djamali