Police na Bugesera byabonye itike yo gukina umukino wa nyuma w’igikombe cy’Amahoro [ AMAFOTO]

  • Ubwanditsi Muhabura
  • 24/04/2024
  • Hashize 3 months
Image

Bugesera FC yasezereye Rayon Sports iyitsinze igitego 1-0 mu mukino wo kwishyura wa 1/2, iyizerera ku bitego 2-0 mu mikino ibiri naho Police FC isezerera Gasogi United iyitsinze penaliti 4-3 nyuma yo kunganya igitego 1-1 mu mikino ibiri.

Byatumye Police FC na Bugesera FCbibona itike yo gukina umukino wa nyuma (finale) w’igikombe cy’Amahoro.

Kuri uyu wa Kabiri tariki 23 Mata 2024, nibwo ku bibuga bitandukanye hakinwe imikino ya ½ yo kwishyura mu Gikombe cy’Amahoro.

Kuri Stade ya Bugesera, Bugesera FC yari yakiriye Rayon Sports, umukino wabereye kuri Kigali tariki 17 Mata Bugesera FC yatsinze Rayon Sports igitego 1-0.

Rayon Sports yatangiye umukino ikinira murubuga rwa Bugesera FC ariko nta shoti rigana mu izamu ikora.

Ku munota wa 25 Rayon Sports yabonye amahirwe yo gufungura amazamu ku mupira mwiza Serumogo Ali yahinduye mu rubuga rw’amahina, Bbaale agorwa no kuwukina, usanga Muhire Kevin washyizeho umutwe, ku bw’amahirwe ye make ukurwamo n’umuzamu Niyongira Patience akoresheje ikiganza.

Ku munota wa 30’ Bugesera FC yabonye amahirwe yo gutsinda igitego kuri Coup-Franc yatewe na Tuyisenge Arsene wa Rayon Sports, Bugesera FC ikiza izamu ndetse umupira ufatwa na Ani Elijah wasize abarimo Ganijuru, awuhereje Farouk aroba Ndiaye, ku bw’amahirwe ya Rayon Sports ujya ku ruhande rw’izamu.

Ku munota wa 35’ Rayon Sports yongeye gusatira izamu rya Bugesera FC ku mupira Muhire Kevin yinjiranye mu rubuga rw’amahina, awuhinduye, abarimo Bbaale na Tuyisenge Arsene bagorwa no kuwutera mu izamu, ubwugarizi bwa Bugesera FC buritambika.

Ku munota wa 44 Bugesera FC yongeye kugerageza amahirwe binyuze Kuri rutahizamu Ani Elijah wari wagoye cyane  ubwugarizi bwa Rayon Sports, watanze umupira kuri Farouk, na we arawumusubiza, ateye ishoti rinyura hejuru y’izamu.

Iminota 45 y’igice cya mbere yarangiye amakipe yombi anganya ubusa ku busa.

Mugice cya Kabiri Bugesera FC yatangiye isatira izamu rya Rayon Sports harimo uburyo bwabonetse ku munota wa 49 ‘ku mupira uteretse watewe na Stephen Bonney inyuma gato y’urubuga rw’amahina, Umunyezamu Khadime Ndiaye awushyita muri koruneri itagize icyo itanga.

Nyuma y’umunota umwe ku munota 50’ Bugesera FC yafunguye amazamu Bugesera FC ifunguye ku gitego cyatsinzwe na Stephen Bonney ku mupira yatereye ku ruhande rw’ibumuso, umunyezamu Ndiaye ananirwa kuwuhagarika umupira ujya mu rushundura.

Ku munota wa 61’ Rayon Sports yabonye amahirwe yo kwishyura igitego ku mupira Tuyisenge Arsene yinjiranye mu rubuga rw’amahina, akinanye na Charles Bbaale ateye ishoti rinyura ku ruhande rw’izamu.

Ku munota wa 70’ umutoza wa Rayon Sports Julien Mette, yakoze imipinduka, Yousseh Rharb asimbura Ishimwe Ganijuru Elie.

Ku munota wa 76 yabonye amahirwe yo gutsinda igitego cya kabiri ku mupira Stephen Bonney yateye uteretse, Ssentongo Farouk Saifi akinishije umutwe, umupira ujya ku ruhande rw’izamu.

Ku munota wa 81’ Rayon Sports yabonye uburyo ku  mupira bw’umupira uteretse utewe na Youssef Rharb, usanga Mucyo Didier ari mu ruhande rw’urubuga rw’amahina, atera ishoti rifashe inshundura ntoya.

Umukino warangiye Bugesera FC itsinze Rayon sports igitego 1-0 mu mukino wo kwishyura wa 1/2, iyizerera ku bitego 2-0 mu mikino ibiri.

Ni ubwa mbere Bugesera FC igeze ku mukino wa nyuma w’iri rushanwa mu mateka yayo.

Bugesera FC yabaye ikipe ya gatatu yo mu Ntara iwugezeho kuva mu 2013 nyuma ya AS Muhanga (mu 2013) na Mukura VS yatwaye Igikombe mu 2018.

Rayon Sports yari ifite igikombe cy’amahoro giheruka, izasigara ku rugo mu mwaka w’imikino utaha.

Mu wundi mu mukino wo kwishyura wa 1/2 wabereye kuri Kigali Pele Stadium hagati wa Gasogi United warangiye Police FC isezereye Gasogi United iyitsinze penaliti 4-3 nyuma yo kunganya igitego 1-1 mu mikino ibiri.

Ikipe izegukana iki gikombe cy’amahoro hagati ya Police FC na Bugesera FC izahagararira u Rwanda mu mukino ya CAF Confederation Cup 2024-2025.

  • Ubwanditsi Muhabura
  • 24/04/2024
  • Hashize 3 months