Perezida Trump yahaye Elon Musk umwanya mu buyobozi

Donald Trump watorewe kuyobora Leta Zunze Ubumwe z’Amerika yagize Elon Musk, Umuherwe wa mbere ku Isi, nk’uzayobora Minisiteri Nshya yashyiriweho kunoza imikorere ya Leta, Department of Government Efficiency (DOGE).

Biteganyijwe ko uru rwego ruzwi nka DOGE (Department Of Government Effiency) ruzatangira imirimo yarwo muri Mutarama 2025 ubwo Trump azaba amaze gusimbura Perezida Joe Biden ku butegetsi.

Nk’uko Trump yabisobanuye, Musk na Vivek Ramaswamy bazafatanya mu kuyobora uru rwego bazakurikirana uburyo amafaranga y’igihugu akoreshwa, bavugurure inzego z’igihugu, bakureho amabwiriza ameze nk’imbogamizi ku iterambere ry’Abanyamerika.

Uyu munyapolitiki yasobanuye ko DOGE izaha inzego za Leta inama n’umurongo wo kugenderaho, kandi ko izakorana n’Ibiro by’Umukuru w’Igihugu n’ibishinzwe gucunga umutungo n’ingengo y’imari, hagamijwe amavugurura no korohereza ishoramari birenze uko byahoze.

Trump yagaragaje ko uru rwego ruzaba ari urw’agateganyo kuko imirimo yarwo izarangira tariki ya 4 Nyakanga 2026, kandi ngo yizeye ko umusaruro ruzatanga uzaba ari impano ikomeye kuri Amerika mu gihe izaba yizihiza isabukuru y’imyaka 250 ibonye ubwigenge.

Trump yari yasezeranyije Musk ko azamuha inshingano yo kuyobora uru rwego ubwo yemeraga kumwamamaza akoresheje urubuga nkoranyambaga X yaguze mu 2022.