Kubera iki umugabane wacu wakomeza kwibasirwa -Madamu Jeannette Kagame

Madamu wa Perezida wa Repubulika Jeannette Kagame asanga igihe kigeze ngo abanyafurika bagire abahanga n’abashakashatsi bafasha Afurika kubonera umuti ibibazo biyugarije by’umwihariko mu rwego rw’ubuvuzi.

 Ibi ni bimwe mu bikubiye mu ijambo Madamu Jeannette Kagame yagejeje ku bitabiriye umuhango wo gutanga igihembo kizwi nka Prix Galien Afrique, umuhango wabereye i Dakar muri Senegal.

Muri uyu muhango witabiriwe n’abanyacyubahiro barimo Perezida wa Senegal Macky Sall , Umuyobozi Mukuru w’Ishami ry’Umuryango w’Abibumbye ryita ku Buzima  Dr Tedros Adanom Gaebreyesus n’abandi, Madamu Jeannette Kagame yagaragaje ko u Rwanda rwihatiye guteza imbere ubumenyi bufasha guhanga ibishya mu rwego rw’ubuzima no kwishakamo ibisubizo bifasha gukemura ibibazo byugarije Abanyarwanda. 

Yatanze urugero ku bushakashatsi bwerekanye uruhererekane rw’ihungabana ku bakomoka ku barokotse jenoside yakorewe abatutsi mu Rwanda mu 1994, ubushakashatsi bwafashije kuvura indwara zitandukanye bityo abarokotse jenoside  n’ababakomokaho bakabasha kugira ubuzima bwiza badaheranwe n’qmateka mabi.

Madamu Jeannette Kagame kandi yavuze ko ubumenyi n’ubushakashatsi ari ishingiro ry’iterambere ry’ikoranabuhanga, bityo kugenda muri icyo cyerekezo bikazafasha Afurika kugera ku cyerekezo  yifuza mu rwego rw’ubuzima, abazabaho mu binyejana bizaza bakazagira ubuzima bwiza.

Ati “Kubera iki umugabane wacu wakomeza kwibasirwa n’ingaruka z’ibyorezo udashobora guhagarika kubera kubura ibikorwa remezo biteye imbere mu buvuzi? Kubera iki twakomeza gutega amaboko abafatanyabikorwa bacu bo hanze ngo tubone ibikoresho by’ubuvuzi n’ingorane bitera nkuko twabibonye muri ili cyorezo cya COVID9?”

Igihembo kizwi nka Prix Galien Afrique gitangwa mu rwego rwo gushimira abashakashatsi, abahanga n’ibigo byakoze ubushakashatsi mu rwego rw’ubuvuzi n’imiti bifasha guteza imbere urwego rw’ubuzima muri Afurika.