Jose Mourinho amaze gusimbura Mauricio Pochettino nk’umutoza wa Tottenham

Jose Mourinho amaze kugirwa umutoza wa Tottenham, akaba asimbuye Mauricio Pochettino wirukanwe ku munsi w’ejo ku wa kabiri.

Uyu Munya-Portugali w’imyaka 56 wahoze atoza Manchester United, amaze gushyira umukono ku masezerano yo gutoza Tottenham kugeza mu mpera y’umwaka w’imikino wa 2022-2023.

Daniel Levy, umuyobozi mukuru wa Tottenham, yagize ati: “Jose ni umwe mu batoza b’umupira w’amaguru bageze ku bintu bikomeye cyane”.

Mourinho yavuze ko “yishimiye cyane” aka kazi.

Mourinho nta kazi yari afite kuva yakwirukanwa na Manchester United mu kwezi kwa cumi na kabiri mu mwaka ushize wa 2018.

Aje muri iyi kipe kuri ubu iri ku mwanya wa 14 ku rutonde rw’agateganyo rwa shampiyona, kandi imaze imikino itanu ishize idatsinda.

Umukino we wa mbere atoza Tottenham uzamuhuza na West Ham United ku wa gatandatu yayisuye.

Pochettino, Umunya-Argentine w’imyaka 47 y’amavuko, yagejeje ku mukino wa nyuma wa Champions League iyi kipe yo mu majyaruguru y’umurwa mukuru London w’Ubwongereza mu mwaka ushize.

Yatsinzwe na Liverpool kuri uwo mukino. Pochettino yari ayitoje imyaka itanu.

Rutahizamu Harry Kane wa Tottenham yashimiye Pochettino wari umutoza we kubera “kumufasha gukabya inzozi ze”.

Mu butumwa bwo kuri Twitter yagize ati: “...Wari umutoza ukaba n’inshuti yanjye, kandi ndagushimira uwo mubano. Nkwifurije ishya n’ihirwe mu byo ugiye gukurikizaho!”

Mourinho wahoze atoza Chelsea, Porto, Real Madrid na Inter Milan, yagiye yanga akazi kenshi k’ubutoza, harimo nko gutoza mu Bushinwa, muri Espanye na Portugali, kuva yakwirukanwa na Manchester United.

Aracyatuye i London kandi yatsindiye ibikombe bitatu bya Premier League na kimwe cya FA mu bihe bibiri yatoje Chelsea. Yanatsindiye igikombe cya Europa League na Carabao Cup atoza Manchester United.

Mbere yaho yanatoje Porto y’iwabo muri Portugali ayihesha igikombe cya Champions League. Yatoje kandi Inter Milan yo mu Butaliyani ayihesha ibikombe bitatu birimo na Champions League mu 2010 ndetse atorwa nk’umutoza wa FIFA w’umwaka.

Yanatoje Real Madrid ayihesha igikombe cya shampiyona ya La Liga ya Espanye mu 2012.

Isesengura rya Dan Roan, umukuru w’ishami ry’imikino rya BBC

Tottenham nta na rimwe yigeze igura umutoza uhenze cyangwa usaba byinshi nka Mourinho, cyangwa ngo isohore amafaranga menshi mu kugura abakinnyi nk’abo yari amenyereye mu makipe nka Real Madrid na Manchester United.

Ariko Tottenham hari aho yageze hakomeye mu myaka micye ishize itozwa na Pochettino. Ubu ifite ikibuga gishya cyayitwaye miliyari imwe y’amapawundi ndetse n’icyo gukoreraho imyitozo, kandi imaze imyaka ine yikurikiranya y’imikino ikina Champions League.

Ubu ifite izina rikomeye i Burayi, kandi ifite abakinnyi bafite impano cyane.

Mourinho amaze hafi umwaka umwe atakiri mu butoza, ariko yakomeje kugira urugo i London.

Ibibazo yagiriye muri Manchester United byatumye atakaza akabyiniriro ke ka ’Special One’ (cyangwa umutoza ’udasanzwe’), ariko ibintu byinshi bikomeye yagezeho mu butoza bituma na n’ubu acyubashywe.

Niyomugabo Albert/Muhabura.rw