Depite Nkusi wa kundaga guhata ibibazo abayobozi yanze kongera kwiyamamaza

Depite Nkusi Juvénal wari umwe mu Badepite bari bamaze igihe kirekire mu Nteko ishinga amategeko, ntazongera kugaragara mu nteko nyuma y’uko yari ayimazemo imyaka 15.

PSD yasohoye itangazo rigaragaza urutonde rw’Abakandida 80 bazayihagararira mu matora y’Abadepite ateganijwe muri Nzeri uyu mwaka,urutonde rutariho Nkusi,bwa mbere mu myaka 15 ishize.

Depite Nkusi yamamaye cyane kubera ko yari umuyobozi wa Komisiyo y’Inteko ishinga amategeko ishizwe gukurikirana imitungo ya rubanda (PAC).

Umunyamabanga mukuru wa PSD, Ngabitsinze Jean Chrysostome yemeje ko Depite Nkusi yanze kongera kwiyamamaza ku bushake bwe.

Yagize ati “Depite Nkusi na Bazatoha Adolphe ntibari ku rutonde. Ntibashatse kongera kwiyamamaza kugira ngo bahe umwanya abakiri bato na bo ngo bashobore kuba Abadepite.”

Yunzemo ati “Turabashimira imyumvire bagaragaje. Bitangiye igihugu banaduhagararira neza nk’ishyaka.”

Ngabitsinze yavuze ko n’ubwo batazakomeza kuba mu nteko ariko bafite ubushobozi bwo gukomeza gutanga umusaruro, kandi ishyaka rikazakomeza kubakoresha igihe bizashoboka.

Abandi Badepite batagaragaye kuri urwo rutonde harimo Depite Jacqueline Mukakanyamugenge na Theodomir Niyonsenga.

Bamwe mu bagarutse kuri uru rutonde harimo Vénéranda Nyirahirwa, Georgette Rutayisire na Jean Pierre Hindura.

Mu matora y’Abadepite aheruka mu 2013, PSD yari yatsindiye imyanya irindwi mu nteko ishinga amategeko.

Ngabitsinze yavuze ko batizeye kongera gutsindira imyanya nk’iy’ubushize ariko ngo barakorera ku migabo n’imigambi bizera ko izatanga icyizere ku batora.

Ishyaka rya PL ryo ryatangaje ko urutonde rw’Abakandida bazayihagararira mu matora y’Abadepite izarusohora muri iki cyumweru.

Hagati aho,umukandida rukumbi wigenga umwe, Philippe Mpayimana, ni we umaze gutangaza ku mugaragaro ko aziyamamaza mu matora y’Abadepite.

Chief editor