CAN 2021: Senegal yegukanye igikombe cy’Afurika ku nshuro ya mbere

Ikipe y’igihugu ya Senegal ni yoyegukanye igikombe cy’Afurika  “CAN 2021”  nyuma yo gutsindira  ikipe ya Misiri ku mukino wa nyuma kuri penaliti 4-2 nyuma yo kunganya 0-0.

Iyi kipe ya Senegal ni igikombe cy’Afurika yegukanye ku nshuro ya mbere nyuma y’uko iyi yari inshuro ya 3 igeze ku mukino wa nyuma (2002, 2019 na 2021). Muri rusange iyi yari inshuro ya 16 Senegal yitabira imikino y’Afurika.

Imikino y’Afurika “CAN 2021”  yagomba kuba  umwaka ushize wa 2021 ariko  kubera COVID-19 yimurirwa uyu mwaka wa 2022 aho yatangiye taliki 09 Mutarama kugeza 06 Gashyantare 2022  muri Cameroun.

CAN 2021  yitabiriwe n’amakipe 24 aho yari gabanyije mu matsinda 6. Itsinda A ryari rigizwe na   Cameroun, Burkina Faso, Ethiopia na Cap Vert. Itsinda B ririmo Senegal, Zimbabwe, Guinea na Malawi. Itsinda C ryari rigizwe na Maroc, Ghana, Comores na Gabon. Itsinda D ryari ririmo Nigeria, Misiri, Sudan na Guinea-Bissau. Itsinda E ryari rigizwe na Algeria, Sierra Leone, Guinea Equatorial  na Cote d’ivoire naho itsinda F rigizwe na Tunisia, Mali, Mauritania na Gambia.

Inzira Senegal na Misiri zanyuzemo

Ikipe ya Senegal yari yatsindiwe na Algeria ku mukino wa nyuma mu mikino y’Afurika iheruka  « CAN 2019 » yari mu itsinda  B  hamwe  na Zimbabwe, Guinea na Malawi.  Senegal yitwaye neza izamuka iyoboye itsinda n’amanota 5 nyuma yo gutsinda Zimbabwe igitego 1-0 ikanganya na Guinea na Malawi 0-0.

Ku ruhande rwa Misiri mu mikino yo mu matsinda  yatsinzwe na Nigeria igitego 1-0 nyuma itsinda Guinea Bissau  na Sudan igitego 1-0 izamuka ari iya kabiri mu itsinda n’amanota 6.

Muri 1/8, ikipe ya Senegal yasezereye Cap Vert iyitsinze ibitego 2-0 naho Misiri isezerera ikipe ya Cote d’Ivoire ku kuri penaliti 5-4 nyuma yo kunganya 0-0. Muri ¼ , ikipe ya Senegal yasezereye Guinea Equatorial iyitsinze ibitego 3-1  naho Misiri isezerera Maroc ku bitego 2-1.

Muri ½ , Senegal yasezereye Burkina Faso ku  bitego 3-1 naho Misiri isezerera Cameroun kuri penaliti 3-1 nyuma yo kunganya 0-0.

Ku mukino wa nyuma wabaye kuri iki cyumweru taliki 06 Gashyantare 2022, Senegal yitwaye neza itsinda Misiri kuri penaliti 4-2 nyuma yo kunganya  0-0 mu minota 120.

Mbere y’umukino wa nyuma, taliki 05 Gashyantare 2022 habaye umukino wo guhatanira umwanya wa 3, ikipe ya Cameroun itsinda Burkina Faso kuri penaliti 5-3 nyuma yo kunganya ibitego 3-3.

Imikino y’Afurika itaha  “CAN 2023” izabera muri Cote d’Ivoire kuva taliki 23 Kamena kugeza  23 Nyakanga 2023. Imikino yo gushaka itike izatangira taliki 21 Werurwe isozwe taliki 27 Nzeri 2022.