APR FC yanganyije na Pyramids FC mu mukino ubanza w’ijonjora

APR FC yanganyije na Pyramids FC igitego 1-1 mu mukino ubanza w’ijonjora rya kabiri rya CAF Champions League, irushanwa rihuza amakipe yatwaye ibikombe iwayo ku Mugabane wa Afurika.

Uyu mukino wabereye muri Stade Amahoro ku mugoroba wo kuri uyu wa Gatandatu, tariki ya 14 Nzeri 2024.

Wayobowe n’Umunye-Ghana Daniel Nii Ayi Laryea wari umusifuzi wo hagati. Uyu musifuzi wabonye izuba ku wa 11 Nzeri 1987, yashyizwe ku rutonde rw’abasifuzi bemewe na FIFA mu 2014.

Umukino wahuje APR FC na Pyramids FC watangiye utuje, amakipe yombi acungana hagati mu kibuga.

APR FC na Pyramids FC si ubwa mbere byari bihuriye mu mikino ya CAF Champions League. Mu mwaka ushize, iyi Kipe yo mu Misiri yakuyemo iy’Ingabo z’u Rwanda, iyitsinze ibitego 6-1 mu mikino yombi.

Ikipe y’Ingabo ni yo yinjiye mu mukino mbere ndetse byatumye abakinnyi bayo bakoresha aba Pyramids FC amakosa.

Ku munota wa 25, Ibrahim Blati Touré ukinira Pyramids FC ni we wahawe ikarita ya mbere y’umuhondo nyuma yo kwivovotera umusifuzi amwereka ko atishimiye icyemezo yafashe.

APR FC yahushije uburyo bukomeye ku munota wa 35, ubwo Yussif Seidu Dauda yateraga ishoti riremereye ari inyuma y’urubuga rw’amahina ariko rinyura hejuru gato y’izamu ririnzwe na Ahmed Naser Mahmoud Elshenawi.

Igice cya mbere cyarangiye amakipe yombi anganya 0-0. Mu gice cya kabiri, APR FC yahise ifungura amazamu ku gitego cyitsinzwe na Mohamed Chibi wa Pyramids nyuma yo kunanirwa kugarura umupira wahinduwe na Mahamadou Lamine Bah.

Nyuma yo kwinjizwa igitego, Pyramids yatangiye kotsa igitutu APR FC, ishaka kwishyura ndetse byaje kuyihira ku munota wa 82 ubwo yabonaga igitego cyo kwishyura cyinjijwe na Fiston Kalala Mayele, rutahizamu ukomoka muri Repubulika Iharanira Demokarasi ya Congo.

Ku mpande zombi, amakipe yakoze impinduka ashaka kubona intsinzi ariko iminota 90 y’umukino n’ine y’inyongera yashyizweho yarangiye anganya igitego 1-1.

Pyramids FC yageze mu cyiciro cy’ijonjora rya kabiri rya CAF Champions League, isezereye JKU FC yo muri Zanzibar ku giteranyo cy’ibitego 9-1 mu gihe APR FC yakuyemo Azam FC yo muri Tanzania iyitsinze 2-1 mu mikino yombi.

Biteganyijwe ko umukino wo kwishyura uzahuza Pyramids FC na APR FC uzabera mu Mujyi wa Cairo mu Misiri ku wa 21 Nzeri 2024.