Abarwayi bashya 231 n’uwa 15 wishwe na COVID-19 mu Rwanda

Kuri uyu wa Kabiri tariki ya 25 Kanama 2020 Minisiteri y’Ubuzima yongeye gutangaza abarwayi bashya 231 b’icyorezo cya COVID-19 hamwe n’undi Munyarwanda w’imyaka 61 y’amavuko wahitanywe na cyo.

Bivuze ko mu minsi itatu gusa mu Rwanda hatahuwe abarwayi bashya 648 na bane bambuwe ubuzima n’icyo cyorezo.

Abo barwayi bashya babonetse mu bipimo 6,128 byafashwe mu masaha 24 ashize, hataha abantu 21 bakize neza. Umubare w’abamaze gutahurwaho icyo cyorezo mu Rwanda wageze 3,537, barimo abamaze gukira bagera ku 1,806 na 1,716 bakirimo kwitabwaho n’abaganga.

Abo barwayi bashya batangajwe uyu munsi barimo 196 bapimwe mu masoko ya Kigali, 30 bapimwe mu bibasiwe kurusha abandi muri Rusizi, batatu bo mu Karere ka Rubavu, umwe wo mu Karere ka Huye, n’undi wo muri Gatsibo.

Abamaze gutahurwaho ubwo burwayi bose babonetse mu bipimo 378,014 bimaze gufatwa kuva umurwayi wa mbere yatahurwa mu Rwanda.

Igikorwa cyo gupima abantu mu buryo bwa rusange mu Gihugu kirakomeje, ndetse kuri ubu ubishatse wese arimo gupimwa COVID-19, akamenya uko ahagaze yasangwa ari muzima agahabwa ikemezo kimworohereza kuba yakorera ingendo mu bihugu byafunguriye amahanga imipaka yabyo.

Minisiteri y’Ubuzima irasaba abaturage kwitwararika cyane ku mabwiriza yo kwirinda kuko uko umubare w’abandura ukomeza kwiyongera ari na ko n’ibyago by’ababura ubuzima bizarushaho kwiyongera.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 barenga miriyoni n’ibihumbi 196 barimo abarenga ibihumbi 922 bakize n’abandi bagera ku bihumbi 28 bahitanywe na cyo. Abamaze kwandura ku Isi bararenga miriyoni 24, barimo abakize barenga miriyoni 16.4 n’abapfuye barenga ibihumbi 821.5.

MUHABURA.RW Amakuru nyayo