Haruna Niyonzima yaciye umuhigo muri Tanzaniya

Haruna Niyonzima yaraye aciye umuhigo wo kwegukana ibikombe bitanu bya shampiyona yaho yikurikiranya.

Nta wundi mukinnyi urabigeraho muri iki gihugu.

Aganira na BBC kuri uyu wa gatatu, Haruna yavuze ko ari “amateka akomeye”.

Yagize ati: “Ntabwo byari byoroshye mu myaka maze hano, naciye mu nzira zigoye, nahuye n’ibinsubiza inyuma. Ni ikintu nshimira Imana kandi muri iyi myaka turimo ntashobora kuzibagirwa. Ndishimye cyane”.

Haruna na Meddie Kagere bakinira ikipe y’igihugu y’u Rwanda, babanje mu kibuga ku ruhande rwa Simba mu mukino batsinze Singida United 2-0 bakegukana igikombe.

Ibi bitego byatsinzwe na Kagere Meddie na John Bocco.

Simba yegukanye igikombe cya kabiri yikurikiranya nubwo hasigaye imikino ibiri ya shampiyona kuko ubu irusha Young Africans amanota umunani.

Haruna yahise agira igikombe cya gatanu cya shampiyona ya Tanzaniya yikurikiranya. Ni we mukinnyi wa mbere ubigezeho muri Tanzaniya.

Bitatu bibanza yabitwaranye na Young Africans. Ashyiraho n’icy’umwaka ushize wa shampiyona hamwe n’icy’uyu bari kurangiza muri Tanzaniya, byombi atwaye ari kumwe na Simba SC.

Gusa nubwo yageze kuri ibi, nta bikombe yatwaranye n’ikipe y’igihugu Amavubi kuva yatangira kuyikinamo mu mwaka wa 2007.

’Sinshaje nkuko babitekereza’

Haruna avuga ko ageze kuri uyu muhigo kubera kwihanganira ingorane yaciyemo ndetse n’ikinyabupfura.

Uyu mugabo wabaye kapiteni w’ikipe y’igihugu y’u Rwanda igihe kinini, yabwiye BBC ko atari umukinnyi ushaje nkuko abantu babitekereza.

Ati: “Impamvu ni uko tumaze gukina igihe kirekire abantu bakaba batwumva buri munsi, ariko ubu iki ni cyo gihe cyacu cyo gukina umupira kuko ubunararibonye turabufite”.

Simba akinira yaraye yegukanye igikombe cya 20 cya shampiyona ya Tanzaniya, ikaba ikurikira mucyeba wayo Young Africans ifite ibi bikombe 27, naho Mtibwa Sugar ikaba izikurikiye n’ibi bikombe bibiri.

BBC NEWS