Minisiteri y’Ubuzima yatangaje ko abantu barwaye Coronavirus bamaze kuba 50

Minisiteri y’Ubuzima yatangaje ko umubare w’abantu banduye COVID-19 mu Rwanda wageze kuri 50 nyuma y’uko hagaragaye abandi 9 banduye baje baturuka mu rugendo rwohanze y’igihugu.

Itangazo rya Minisante ryo kuri uyu wa kane tariki ya 26 Werurwe rivuga ko hagaragaye abandi barwayi 9 banduye icyorezo cya COVID-19, giterwa na Coronavirus.

Aba barwayi 9 biyongerereye kuri 41 basanganywe iki cyorezo, bagera kuri 50 banduye COVID-19 kuva umurwayi [Umuhinde ukorera rimwe mu mashami ya Loni mu Rwanda] wa mbere yaboneka mu gihugu ku wa 14 Werurwe 2020.

Abarwayi bashya bagaragaye harimo:

  Abantu 5 bageze mu Rwanda baturutse i Dubai bagahita bashyirwa mu kato

  Umuntu 1 waturutse muri Leta Zunze Ubumwe za Amerika agahita ashyirwa mu kato

  Umuntu 1 waturutse mu Buholandi watahuwe ko yahuye n’undi urwaye Coronavirus mu Rwanda, agahita ashyirwa mu kato

  Abantu 2 batahuwe ko bahuye n’abandi barwaye Coronavirus mu Rwanda, bahise bashyirwa mu kato.

Minisiteri y’Ubuzima yatangaje ko abarwayi bose bavurirwa ahantu habugenewe kandi ko bari koroherwa. Abenshi muri bo “ubu nta bimenyetso bya Coronavirus bagaragaza. Nta n’umwe urembye.”

Denis Fabrice Nsengumuremyi /MUHABURA.RW