Umubare w’abandura Koronavirus uriyongera umunsi ku wundi, kuri ubu haravugwa inkuru y’uko Perezida wa Komisiyo y’Umuryango w’Ubumwe bw’Afurika, Moussa Faki Mahamat, na we ari mu kato kubera Koronavirusi.
Abinyujije kuri Twitter, Mahamat yavuze ko hari umukozi bakorana wasanganwe iyi virusi, bituma n’abandi bakorana na we barimo Mahamat ubwe bishyira mu kato.
Mahamat yagize ati, “Ndahamya ko umwe mu bo dukorana mu biro yapimwe bakamusangana COVID-19 (Indwara iterwa na koronavirus). Mu rwego rwo kwirinda, ubu ndi mu kato hamwe na bamwe mu bo dukorana mu biro byanjye.”
Minisitiri w’Intebe w’u Bwongereza, Boris Johnson, kuri uyu wa Gatanu na we bamusanganye koronavirusi. Yavuze ko bamusanganye ibimenyetso by’icyo cyorezo, akaba yishyize mu kato iwe mu rugo.
Yongeyeho ko aza gukomeza kuyobora Guverinoma mu rugamba rwo kurwanya Coronavirus akoresheje uburyo bw’ikoranabuhanga bw’amashusho buzwi nka Viceo-Conference, aho abantu baganira barebana batari hamwe.
Kuri uyu wa Gatanu, Minisitiri w’Ubuzima w’u Bwongereza, Matt Hancock, na we yatangaje ko yasanganwe koronavirusi imaze guhitana abantu 759 muri icyo gihugu mu gihe abamaze kuyandura bose hamwe ari 14,500.
Abanduye Koronavirusi mu Rwanda kuri ubu ni 50, nk’uko byaraye bitangajwe na Minisiteri y’Ubuzima.
Denis Fabrice Nsengumuremyi MUHABURA.RW
