Turabona izamuka mu rwego rw’imari ariko ubukene ntibugabanuka -Senateri

Komisiyo ya Sena y’Iterambere ry’Ubukungu n’Imari, yagaragaje bimwe mu byavuye mu isuzuma rya Raporo y’Ibikorwa bya Banki Nkuru y’u Rwanda mu mwaka wa 2017/2018.

Senateri Gallican Niyongana yavuze ko mu gihe urwego rw’imari rurimo kwiyongera mu gihugu, bitumvikana uburyo igabanuka ry’ubukene mu banyarwanda ryo rigenda gake.

Raporo ya BNR yagaragaje ko ubukungu bw’u Rwanda bwiyongereye ku kigero cya 8.9% mu 2017-2018, inganda ziyongereyeho 8.5% zivuye kuri 1.9% mu 2016/2017, umusaruro ukomoka kuri serivisi wazamutseho 9.7% uvuye kuri 5.4% mu 2016/2017.

Mu korohereza abashoramari, BNR yagaragaje ko yagabanyije inyungu itangiraho amafaranga kuri banki z’ubucuruzi iva kuri 6% muri Kamena 2017 igera kuri 5.5% mu Ukuboza 2017.

Mu 2017/2018, amafaranga akoreshwa imbere mu gihugu yazamutseho 9.5% ugereranyije na 12.7% mu 2016/2017, naho inyungu banki zihera abakiriya bazo ku nguzanyo yageze kuri 17.15% mu 2017/2018 ivuye kuri 17.25% mu 2016/2017.

Nyuma yo gusobanurirwa na Komisiyo kuri ibi biganiro bagiranye na BNR, Senateri Niyongana yavuze ko niba bigaragara ko urwego rw’imari mu gihugu rurimo gutera imbere, bitumvikana uburyo iyo ugiye mu iterambere ry’abanyarwanda usanga ho bitihuta.

Ati “Turabona izamuka mu rwego rw’imari ariko ubukene ntibugabanuka mu buryo bwihuse, ndabona dushimishwa n’inzu zizamuka n’ibindi ariko umuturage agakomeza gusubira inyuma.”

Uyu musenateri yavuze ibi mu gihe n’Ubushakashatsi bwa Gatanu ku mibereho y’ingo mu Rwanda (EICV5), bwasohotse mu 2018, bwagaragaje ko umubare w’abanyarwanda mu 2016/2017 wari miliyoni 11.8, muri bo abagera kuri 38.2% bari mu bukene naho 16.0% bari mu bukene bukabije.

Ubu bushakashatsi bwagaragaje ko umubare w’abari mu bukene ari 38.2% bavuye kuri 39.1% bariho mu bushakashatsi nk’ubu bwa Kane bwamuritswe mu 2013/14 bavuye kuri 44.9% mu 2010/2011.

Abanyarwanda bari mu bukene bagabanyutseho 0.9%, naho abari mu bukene bukabije bagabanukaho 0.4% bava kuri 16.3% bagera kuri 16.0%, bigaragaza ko igabanuka ry’ubukene ritihuta.

Umuyobozi wa Komisiyo ya Sena y’Iterambere ry’Ubukungu n’Imari, Muhongayire Jacqueline, mu gusubiza bimwe mu bibazo Abasenateri babajije, yavuze ko hari byinshi bigomba gukemurwa birimo nk’urwego rwa SACCO kuko ngo rurimo ibibazo byinshi, nk’inyungu ku nguzanyo yazamutse ikagera ku rwego rw’ibindi bigo by’imari.

Yagize ati “Uretse BNR na Minisiteri izigenzura (SACCO) ikwiye kwinjira muri ibyo bibazo.”

Mu bindi bibazo Sena yavuze ko bigomba kwigwaho birimo amafaranga asabwa n’amabanki ku bishyura imisoro y’Ikigo cy’imisoro n’Amahoro (RRA), amafaranga acibwa abaturage n’amabanki kuri serivisi zitandukanye zirimo kubikuza hakoreshejwe sheki, hamwe n’amafaranga bishyura iyo bashaka serivise za Irembo.

Inteko Rusange ya Sena yafashe umwanzuro ko ku bufatanye na Biro yayo, izategura inama yo kungurana ibitekerezo n’inzego zitandukanye bireba kugirango Sena izabone amakuru ahagije ku bibazo byagaragajwe bikibangamiye abaturage.

Chief editor/MUHABURA.RW