Umuyobozi wa Kaminuza ya Leta ya Kenya mu Rwanda arashinjwa kuyiba miliyoni 205

Kaminuza ya Leta ya Kenya y’Ubuhinzi n’ikoranabuhanga (Jomo Kenyatta University of Agriculture and Technology -JKUAT) irashinja umuyobozi w’ishami ryayo mu Rwanda kuyiba miliyoni 27 z’amashilingi y’icyo gihugu (205 000 000 frws).

Ubuyobozi bw’iyo kaminuza, ku wa 28 Mata 2016, bwasobanuriye inteko ishinga amategeko ya Kenya uburyo Anthony Luvanda yabibye ako kayabo k’amafaranga avuga ko ashaka kugura ikibanza cyo kubakwamo icyicaro cy’ishami ryabo mu Rwanda. Umuyobozi wa Kaminuza wungirije Mabel Imbuga yavuze ko Luvanda wari uyoboye JKUAT-Kigali, yahise aburirwa irengero nyuma yo kubatekera imitwe akabacucura. Imbuga yavuze ko ayo mafaranga yavuye mu nguzanyo idasanzwe kaminuza ya JKUAT yatse I&M Bank Rwanda na miliyoni 9 z’amashilingi ya Kenya yavuye mu mafaranga yatanzwe n’abanyeshuri.

Uyu muyobozi yasobanuriye inteko ya Kenya ko inama y’ubuyobozi bw’iyo kaminuza yari yemeje kugura ikibanza mu Rwanda ariko ko itigeze yemeza kwaka inguzanyo yo kukigura muri I&M Bank Rwanda. Imbuga yavuze ko mu gihe bari bagikurikirana ibyemezo byo gukorera mu Rwanda muri Minisiteri y’Uburezi (MINEDUC) , uhagarariye JKUAT mu Rwanda yegereye iyo banki mu ibanga rikomeye akaka inguzanyo ubundi akabura. Ati” Turi gukora iperereza ku buryo yabonye iyo nguzanyo adahawe uruhushya n’inama nkuru y’iyo kaminuza.” Yongeyeho ko muri iki cyumweru ubuyobozi bukuru bwa Kaminuza ya Kenya y’Ubuhinzi n’ikoranabuhanga (JKUAT) buzasura u Rwanda bukamenya impamvu nyamukuru yihishe inyuma y’ubwo bujura.

Abadepite ba Kenya babajije impamvu umuyobozi w’ishami rya Kaminuza ya Leta ashobora guhabwa amafaranga angana gutyo atasinyiwe n’ubuyobozi bukuru…, butanabizi. Depite uhagarariye komite ishinzwe gukurikirana Imari ya Leta ya Kenya mu Nteko , Adan Keynan, yagize ati” Ibi ntibyumvikana, biranatangaje ukuntu umuntu ku giti cye yegera banki agakoresha izina ry’ikigo cya Leta akaka inguzanyo ubundi akabura.” Ikinyamakuru The Star kivuga ko Imbuga yasobanuye ko kaminuza ya JKUAT yari yemerewe n’amategeko gufungura amashami mu Rwanda na Tanzania idasabye uruhushya Minisiteri y’Uburezi. Kaminuza ya JKUAT yafunguye ishami mu Rwanda mu 2010 bigenwe n’itegeko rya Leta ya Kenya ryo mu 1994 riha inama nkuru ya Kaminuza ubushobozi bwo gufata imyanzuro.

Iryo tegeko ryasimbuwe n’irya 2012 rigenga kaminuza nkuru za Leta y’icyo gihugu ryambuye kaminuza ububasha bwo kwifatira imyanzuro. Kaminuza zo muri Kenya zikomeje gufungura amashami ya zo mu Rwanda; kuri ubu kaminuza yigenga Mount Kenya na JKUAT zatangiye kwigishiriza mu Rwanda mu gihe Kenyatta University yitegura gufungura ishami i Kigali muri uyu mwaka.Src:Imvaho

Yanditswe na Ubwanditsi/Muhabura.rw