Umukuru w’umutwe wa IS yagaragaye muri videwo bwa mbere mu myaka itanu

Umutwe wiyita leta ya kisilamu (IS) watangaje videwo igaragaza umugabo ivuga ko ari umukuru wayo, Abu Bakr al-Baghdadi, asezeranya kwihorera ku gutakaza igice uyu mutwe wagenzuraga.

Ntabwo arongera kugaragara mu ruhame guhera mu mwaka wa 2014 ubwo, ari mu mujyi wa Mosul muri Irake, yatangazaga ishingwa ry’”ubutegetsi” bwa leta yiyita iya kisilamu, mu bice cya Syria na Irake.

Muri iyi videwo nshya y’iminota 18, Baghdadi yemera ko uyu mutwe watsindiwe mu mujyi wa Baghuz wo muri Syria, wa nyuma wari indiri y’uyu mutwe muri ako karere.

Ntibizwi neza igihe iyi videwo yafatiwe. IS ivuga ko iyi videwo yafashwe muri uku kwezi kwa kane.

Muri iyi videwo yatangajwe ku rubuga al-Furqan rw’icengezamatwara rwa IS, Baghdadi avuga ko yabonye ubutumwa bw’imitwe y’intagondwa yo muri Burkina Faso na Mali buvuga ko yamuyobotse.

Avuga kandi no ku myigaragambyo yo muri Sudani no muri Algeria – akavuga ko “intambara ntagatifu ya jihadi” ari wo muti wonyine ku “banyagitugu”.

Abategetsi b’ibi bihugu – bari bamaze imyaka ku butegetsi – bahiritswe muri uku kwezi kwa kane.

Muri iyi videwo kandi, ishusho ya Baghdadi irarigita ahagana ku musozo wayo, nuko hakumvikana ijwi rye avuga ku bitero byo muri Sri Lanka byagabwe kuri Pasika, bigasa nk’ibica amarenga ko icyo gice cyafashwe nyuma yaho iyo videwo yari yamaze gufatwa.

Baghdadi avuga ko ibitero byo muri Sri Lanka byagabwe mu rwego rwo kwihorera ku gutsindwa kwa IS mu mujyi wa Baghuz wo muri Syria.

Umunyamakuru wa BBC Mina al-Lami avuga ko amagambo ya mbere IS yatangaje kuri ibyo bitero, nta kintu avuga kuri uyu mujyi wa Baghuz.

Umuvugizi wa minisiteri y’ububanyi n’amahanga ya Leta Zunze Ubumwe z’Amerika yavuze ko iyo videwo n’ayo majwi bizagenzurwa n’abasesenguzi, bakareba niba koko ari iby’umwimereri.

Yongeyeho ko urugaga rw’ingabo ziyobowe n’Amerika rugifte umuhate wo gutuma abakuru ba IS “basigaye bashyikirizwa ubucamanza bakwiriye”.

Baghdadi ni Umunya-Irake ubundi izina rye ry’ukuri rikaba ari Ibrahim Awwad Ibrahim al-Badri – aheruka kumvikana mu majwi mu kwezi kwa Nyakanga k’umwaka ushize wa 2018.

Niyomugabo Albert/MUHABURA.RW