Umugore wonkerezaga Umwana kuri stationya polisi yarekuwe

Umugore wo muri Ethiopia wonkerezaga umwana we w’amezi atandatu aho yari afungiye ku biro bya polisi mu mujyi wa Shambu mu burengerazuba bw’igihugu, yaraye arekuwe.

Ubwo Chaltu Takele – hamwe n’izindi mpirimbanyi 75 bagenzi be bashyigikiye umutwe wa Oromo Liberation Front (OLF) – yatabwaga muri yombi mu mpera y’icyumweru gishize, yasize umwana we amusigira nyina.

Uwo nyirakuru w’uwo mwana w’umukobwa yari amaze icyo gihe amushyira nyina aho yari afungiye inshuro eshatu ku munsi ngo amwonse.

Madamu Chaltu yabwiye BBC ducyesha iyinkuru ko yatawe muri yombi mu mukwabu wabaye mu rucyerera rwo ku cyumweru gishize kuko yacyekwagaho kuba inshuti y’uwahoze ari umurwanyi w’umutwe OLF.

Mbere yuko gutabwa muri yombi kwe kwa vuba aha, mu mwaka wa 2017 na 2019 nabwo yari yarafungiwe ku biro bya polisi, ariko igihe kirekire cyane yafunzwe ni imyaka umunani mbere yuko arekurwa mu 2016.

Madamu Chaltu ni we ukuriye OLF mu gace ka Horo Guduru Wollega Zone mu karere ka Oromia.

Chaltu Takela

OLF – wahoze ari umutwe w’inyeshyamba uharanira uburenganzira bw’abo mu bwoko bwa Oromo – ni umwe mu mitwe myinshi ya politike yakuriweho imiziro na Minisitiri w’intebe Abiy Ahmed, wakoze amavugurura menshi kuva yagera ku butegetsi mu kwezi kwa kane mu 2018.

Ku wa kabiri w’iki cyumweru, umuryango uharanira uburenganzira bwa muntu Amnesty International wamaganye ifungwa rye.

Wavuze ko gutabwa muri yombi kwa Madamu Chaltu n’abandi “biteye impungenge kandi bishobora kubangamira uburenganzira bwo kwisanzura mu kuvuga no kujya mu ishyirahamwe mbere y’amatora yo mu 2020”.

Amatora muri Ethiopia ateganyijwe kuba mu kwezi kwa munani uyu mwaka

Sindayiheba MUHABURA.RW