Ubutumwa bwa Perezida wa Repubulika Paul Kagame yageneye abakinnyi b’Amavubi

Umukuru w’Igihugu uri muri Ethiopia aho yitabiriye inama ya 26 y’Abakuru b’Ibihugu na za guverinoma zihuriye mu Muryango wa Afurika yunze Ubumwe, yatangaje ko yamenye iby’uko Amavubi yasezerewe muri CHAN gusa avuga ko yizera ko nibura abakinnyi baba bitanze uko bashoboye.

U Rwanda rwakiriye irushanwa ry’amakipe y’ibihugu ku bakinnyi bakina imbere mu bihugu byabo rizwi nka Chan. Ni irushanwa riri kuba ku nshuro yaryo ya kane. Ikipe y’Igihugu, Amavubi, yasezerewe muri ¼ itsinzwe na Les Leopards ya Repubulika Iharanira Demokarasi ya Congo ibitego bibiri kuri kimwe. Ni mu mukino aho iminota 90 yari yarangiye amakipe yombi anganya igitego kimwe, Congo Kinshasa iza kubona igitego cy’intsinzi ku munota wa 113.


Ubutumwa bwagaragaye ku rukuta rwa Twitter umukuru w’igihugu akoresha

Umukuru w’Igihugu abinyujije ku rukuta rwe rwa Twitter, yatangaje ko yamenye ko Amavubi yatsinzwe, ndetse avuga ko ari ibintu bibaho gutsindwa. Akomeza agira ati “Ndizera ko abakinnyi nibura bagaragaje ishyaka.” Yongeye ho ko u Rwanda rukwiye gukomeza kwitwara neza ruba igihugu cyakiriye irushanwa neza, ibintu byose bigakorwa ku rwego rwo hejuru.

Gusa n’ubwo ikipe y’igihugu isezerewe mu irushanwa abakinnyi bagaragaje ishyaka ndetse bakoresha imbaraga zidasanzwe mu kibuga.

Yanditswe na Editor1/Muhabura.rw