Umunyamakuru Eric Kabendera kuri uyu wa mbere yagejejwe imbere y’urukiko rwa Kisutu i Dar es Salaam aregwa ibyaha bitandukanye n’ibyo bamufashe bavuga.
Kabendera yatawe muri yombi mu ntangiriro z’icyumweru gishize i Dar es Salaam, polisi yatangaje ko akekwaho ko hari uburenganzira yihaye nk’umunyatanzania kandi ari umunyamahanga.
Eric Kabendera, asanzwe yandika inkuru zicukumbuye ku binyamakuru mpuzamahanga bitandukanye, birimwo The Guardian cyo mu Bwongereza n’ibindi.
Uyu munsi kuwa mbere, uyu munyamakuru wandika inkuru zicukumbuye yagejejwe imbere y’urukiko aregwa ibyaha bitatu bishya.
Ibyo byaha bigizwe n’icyaha cyo Kuyobora itsinda ry’abagizi ba nabi, Kutishyura imisoro ndetse n’Iyezandonke
Inyandiko y’urukiko igaragaza ko Kabendera ashinjwa ko hagati y’ukwezi kwa mbere 2015 n’ukwezi kwa karindwi 2019 yagiye afatanya n’abandi bantu ariko batari mu baregwa, mu bikorwa bigize icyaha byo kwigwizaho inyungu.
Araregwa kandi ko hagati y’icyo gihe atishyuye, nta mpamvu atanze, imisoro ya miliyoni 173 z’amashiringi ya Tanzania ku kigo cyaho gishinzwe imisoro.
Araregwa kandi iyezandonke mu kwakira amashiringi miliyoni 173 kandi azi neza ko ayo mafaranga ari ayo gukoreshwa mu bikorwa bigize ibyaha no kutishyura imisoro.
Gusa muri uru rukiko ntabwo Kabendera yahawe umwanya wo kwisobanura kuri ibi birego ashinjwa dore ko bitandukanye cyane n’ibyo yabanje gushinzwa agifatwa.
Niyomugabo Albert/MUHABURA.RW
