Abantu barenga 70 nibo bivugwa ko bahitanywe n’igisasu giteze mu modoka mu masaha yo mu gitondo ku murwa mukuru wa Somalia i Mogadisho.
Icyo gisasu cyaturikiye mu gice k’igenzura ry’umutekano, mu masangano y’umuhanda agendwa cyane i Mogadisho.
Abdikadir Abdirahman Haji Aden, watangije ikigo Aamin gikoresha imbangukiora gutabara yabwiye ibiro ntaramakuru Reuters ko “kugeza ubu abantu 61 ari bo bajyanwe bapfuye”.
Nta mutwe uriyitirira icyo gitero, ariko abarwanyi ba Al-Shabab bamaze kugaba ibitero byinshi muri ako gace.
Al-Shabab, umutwe w’abarwanyi ba ki Islam wiyunze na Al-Qaeda, umaze imyaka 10 waratangije urugamba rwa kinyeshamba.
Wirukanwe mu murwa mukuru mu 2011 ariko uracyagenzura ibice bitari bike by’igihugu.
Ababibonye bikimara kuba bavuze ko yari amahano atagirauko asa kuko imirambo yari inyanyagiye ahantu hose.
Umwe muri bo witwa Sakariye Abdukadir yagize ati”Icyo nabona cyo yari imirambo inyanyagiye hiryo n’ino… yari ivanze n’ibice bice b’igisasu, imwe yahiye ku buryo utamenya umuntu”.
Mohamed Abdirizak, umwe mu badepite bo muri Somalia, yavuze ko abahasize ubuzima barenga 90, ariko akavuga ko ayo ari amakuru yahawe atarashobora kwemeza.
Uwahoze ari minisitiri w’umutekano yongeyeho ati: “Imana igirire imbabazi abahitanywe n’iki gitero cy’ubunyamaswa.”
Abantu batanu bashwe mu ntangiriro z’ukwezi ubwo Al-Shabab yagabaga ibitero i Mogadisho kuri hotero ikundwa n’abanyepolitike, abahagarariye ibihugu byabo ndetse n’abayobozi mu gisirikare.
Chief Editor/MUHABURA.RW
