Rubavu: Balinda Elie wari umujura ruharwa yarashwe n’abasirikare ashaka gutoroka mu ma sa yine z’ijoro

Umugabo wo mu Kigero cy’imyaka 50 witwa Balinda Elie bivugwa ko yari umujura ruharwa yishwe arashwe n’abasirikare ubwo yashakaga gutoroka .

Uyu mugabo yarashwe mu ma sa yine z’ijoro ryo kuri uyu wa Gatatu tariki ya 7 Ukuboza 2016 mu Kagali k’Amahoro, umudugudu w’Amahoro.

Umunyamabanga Nshingwabikorwa w’Akagali k’Amahoro Nyirakamana Dafrosa avuga ko uyu mugabo yari asanzwe azwiho ingeso y’ubujura kuko ngo yarashwe nyuma yo gufatirwa mu Karere ka Rutsiro aho yari yaratorokeye nyuma yo kwiba ibikoresho byo mu nzu.

Nyirakamana Dafrosa yagize ati “ Dukurikije amakuru dufite uyu mugabo yari igisambo cya ruharwa, ejo bundi yibye umugabo ibikoresho byo mu nzu ajya Rutsiro hanyuma amusangayo bamushyikiriza inzego z’umutekano, nijoro yari atorotse ari kumwe n’inzego z’umutekano biba ngombwa y’uko bamurasa kuko yari abacitse”.

Ubuyobozi buvuga ko kumenya aho uyu mugabo abarizwa hihariye bigoye kuko afite abagore batatu batuye mu duce dutandukanye ari two, Rugerero, Mbugangali na Buhuru hose ni mu Karere ka Rubavu.

Umwe mu bamuzi bigeze no gufungirwa hamwe avuga ko yari akuriye agatsiko k’abajura kazwi ku izina ry’abuzukuru ba Shitani bayogoje Umujyi wa Rubavu.

Balinda Elie ngo yari umujura uzwi mu Mujyi wa Rubavu, akaba yari amaze igihe gito afunguwe n’ubundi azira ubujura.

Mu mezi abiri ashize mu Karere ka Rubavu hamaze kuraswa abajura batandatu barimo batatu barasiwe mu Murenge wa Nyamyumba umwe akaba yararashwe yiba inka, mu gihe mugenzi wa bo we yarashwe ashaka kurwanya Polisi.

Yanditswe na Ubwanditsi/Muhabura.rw

Subiza

Email Yawe Ntiribugaragazwe