Raila Odinga yavuze ko icyorezo cya Coronavirus ari nk’intambara ya gatatu y’isi iburamo ibisasu

Raila Odinga, umutegetsi mu muryango w’ubumwe bw’Afurika wahoze ari Minisitiri w’intebe wa Kenya, amaze kwiyongera ku banyapolitiki bakoresheje amagambo nk’ayo mu ntambara mu kuvuga kuri coronavirus.

Odinga, intumwa yo ku rwego rwo hejuru ya AU mu bijyanye n’ibikorwa remezo, yavuze ko iki cyorezo ari nk’intambara ya gatatu y’isi iburamo [ibisasu bya] ’bombes’”.

Yabwiye igitangazamakuru SABC cya leta y’Afurika y’epfo ati:“Yemwe no mu ntambara ya kabiri y’isi, ntabwo twigeze tugira impfu nk’izo tumaze kubona mu gihe gito gishize.

Raila Odinga, umutegetsi mu muryango w’ubumwe bw’Afurika yaburiye umugabane w’Afurika avuga ko uzasigara wirwariza , iki cyorezo cya coronavirus ni kimara kurangira.

Yagize Ati: “Ibihugu by’Afurika bizabona ko ukuri ari uko nta muntu n’umwe uzabifasha kuko buri wese yagizweho ingaruka. Uburayi buri ku mavi [buri hasi], Amerika iri kurira, ndetse n’Ubushinwa buri kurira.Hafi 85% by’ubucuruzi bw’Afurika ibukorana n’amahanga kandi bwinshi muri bwo bugizwe n’umutungo kamere n’ibikomoka ku buhinzi twohereza mu mahanga.Ubu noneho ducyeneye kwireba twe ubwacu tugacuruzanya hagati yacu muri Afurika”.

Imibare ya Kaminuza ya Johns Hopkins yo muri Amerika igaragaza ko muri Afurika abantu bagera ku 49,612 bamaze kwemezwa ko banduye Covid-19.

Uwo mubare urimo n’abagera ku 1,913 imaze kwica ndetse n’abandi 16,539 bamaze kuyikira.

Niyomugabo Albert/MUHABURA.RW