Perezida Trump avuga ko intambara iramutse ibaye, Irani ’yasenyuka burundu’

Perezida Donald Trump wa Leta Zunze Ubumwe z’Amerika yavuze ko adashaka intambara, ariko aburira Irani ko iramutse ibaye yaba ivuze “isenyuka rya burundu” rya Irani.

Mu kiganiro na televiziyo NBC yo muri Amerika ku munsi w’ejo ku wa gatanu, yavuze ko Amerika ishyize imbere ibiganiro, ariko ko itakwemerera Irani gukora intwaro kirimbuzi za nikleyeri.

Yanasobanuye birushijeho icyemezo yafashe ku munota wa nyuma cyo kwisubiraho ku bitero by’indege byo kwihorera ku ihanurwa muri iki cyumweru ry’indege nto yitwara nta mupilote (drone) y’Amerika, avuga ko yabwiwe ko abaturage bagera ku 150 ba Irani bari kubipfiramo.

Yagize ati: “Sinabikunze. Sintekereza ko byari bishyize mu gaciro”.

Yavuze ko umugambi wo gutera Irani “wari wamaze kunoga, urindiriye gusa ko nywemeza”, ariko avuga ko yahise abaza abajenerali b’Amerika abantu bari gupfira muri ibyo bitero, nuko yisubiraho.

Yahakanye amakuru avuga ko indege z’intambara z’Amerika zari zamaze kugera mu kirere zitumbereye muri Irani.

Irani ivuga ko iyo drone y’Amerika yahanuye yari yinjiye mu kirere cyayo mu rukerera rwo ku wa kane. Amerika ishimangira ko drone yayo yarasiwe mu kirere ubundi gihuriweho n’amahanga atandukanye, kitari icya Irani.

Umwuka w’ubushyamirane ukomeje gututumba hagati y’ibihugu byombi, Amerika ikaba iherutse kwegeka kuri Irani ibitero ku bwato bwayo butwara ibikomoka kuri peteroli bukorera muri ako karere. Irani yatangaje ko izarenza ikigero cyemewe ku rwego mpuzamahanga muri gahunda yayo ya nikleyeri.

Mu mwaka ushize wa 2018, Amerika yikuye mu masezerano yari yagiranye na Irani mu mwaka wa 2015, agamije kugabanya ibikorwa bya nikleyeri bya Irani.

Ubu Amerika yasabye akanama k’umutekano mu muryango w’abibumbye ko gaterana ku wa mbere w’icyumweru gitaha kakiga kuri Irani.

Televiziyo ya Irani yatangaje amafoto ivuga ko ari ay’ibyasigaye kuri drone y’Amerika Irani yahanuye muri iki cyumweru

Niyomugabo Albert /Muhabura.rw