Minisitiri w’Ubuzima, Dr Diane Gashumba arahumuriza Abanyarwanda n’abagenderera u Rwanda

Minisitiri w’Ubuzima, Dr Diane Gashumba arahumuriza Abanyarwanda n’abagenderera u Rwanda nyuma y’uko Ishami ry’Umuryango w’Abibumbye ryita ku Buzima ryemeje ko hari icyorezo cya Ebola mu majyaruguru ya Repubulika iharanira Demokarasi ya Congo

Kuri uyu wa 13 Gicurasi ni bwo Ishami ry’umuryango w’Abibumbye (OMS) ryemeje ko ibyagaragaye mu majyaruguru y’igihugu cya Repubulika Iharanira Demokarasi ya Congo ari Ebola, mu gice cya Bas Uele ku birometero birenga 1,609 uturutse ku mupaka w’u Rwanda

Nk’uko bigaragara mu itangazo rya OMS, ngo Ebola yatangiye kugaragara muri iki gihugu gihana imbibi n’u Rwanda ku wa 22 Mata, kuva icyo gihe hamaze kugaragara abarwayi 9 muri bo babiri barapfuye umwe byemezwa ko yahitwanywe na Ebola.

Mu itangazo ryashyizwe ahagaragara rigasinywaho na Minisitiri w’Ubuzima Diane Gashumba, iyi minisiteri irahumuriza Abanyarwanda n’abarugenderera ko hafashwe ingamba mu gukumira iki cyorezo bakaba basabwa kutagira ubwoba

Ngo Minisitiri y’Ubuzima ifatanyije n’inzego bireba zose binyujijwe mu itsinda rishinzwe ubutabazi bwihuse hashyizweho ingamba zo kugenzura icyorezo cya Ebola kandi ikaba yiteguye bihagije.

Indwara ya Ebola yandurira mu maraso cyangwa amatembabuzi y’umuntu uyirwaye iyo ahuye n’umuzima.

Iyi ndwara irangwa no kugira umuriro, kurwara umutwe, kuribwa mu ngingo, kubabara mu muhogo, gucika intege, guhitwa, kuruka cyane kandi kenshi, kuribwa mu nda no kuva amaraso ahantu hose hari umwenge ku mubiri w’umuntu.

Minisiteri y’ubuzima yasabye Abanyarwanda n’abanyamahanga bagenderera u Rwanda kwirinda gukora ingendo zitari ngombwa ahagaragaye Ebola, kwihutira kujya kwa muganga mu gihe hari ugaragayeho ibimenyetso byavuzwe haruguru, kugira umuco wo gukaraba intoki hakoreshejwe amazi meza n’isabuni ndetse no kugira umuco wo kwivuza hakiri kare igihe cyose umuntu yumva arwaye.

Nta mwaka urashira OMS itangaje ko icyorezo cya Ebola kirangiye mu bihugu byo muri Afurika y’Uburengerazuba, aho yari yaribasiye Repubulika ya Guinné ndetse na Liberia


Uwishwe na Ebora photo INTERNET

Yanditswe na Ubwanditsi/MUHABURA.RW

Subiza

Email Yawe Ntiribugaragazwe