Polisi ya Kenya yatangiye iperereza ku muturage wo mu Burundi waguye mu Mujyi wa Nairobi.
Jean de Dieu Kabura ukomoka mu Burundi wari usanzwe atuye mu gace ka Kawangware, umurambo we wasanzwe hafi y’umuhanda witwa Kinyanjui.
Joseph Ondoro umuyobozi wa Polisi mui gace uyu mugabo yari atuyemo, yavuze ko Jean de Dieu Kabura yabonywe n’abantu bagendaga n’amaguru
Joseph Ondoro yagize ati “kugeza ubu ntabwo turamenya uwishe uyu Murundi, gusa iperereza ryatangiye ngo hamenyekane uwamwishe n’icyo yari agamije.”
Uyu muyobozi wa Polisi yabwiye ikinyamakuru the standard ko bitaramenyekana niba uyu murundi yari asanzwe hari ishyaka arimo mu Burundi.
Gusa bamwe mu barwanya Perezida Pierre Nkurunziza bo baravuga ko uyu mugabo wishwe ngo yari asanzwe ari umurwanashyaka mu ishyaka rya MSD rikomeye rirwanya uyu Nkurunziza, bityo ngo nicyo yazize.
Polisi yo iravuga ko ikomeje guperereza ngo imenye niba uyu murundi yari asanzwe ari impunzi.
Imiryango itegamiye kuri Leta muri Kenya iravuga ko hakwiye iperereza ryihuse ngo hamenyekane iby’uru rupfu.
Cidi Otieno uhagarariye imiryango iharanira kurengera itegeko nshinga muri Kenya, aravuga ko hakwiye iperereza, kandi Abarundi bari muri Kenya bagacungirwa umutekano ukomeye.
Kuva muri Mata 2015, Abarundi barenga 400 bamazwe kwicirwa mu Burundi nyuma y’aho Perezida Nkurunziza atangaje ko azongera kwiyamamariza manda ya gatatu, amatora yaje no gutsindamo ariko bigakurirwa n’imvururu, zanatumye abarenga ibihumbi 200 bamaze guhunga igihugu.
Yanditswe na Ubwanditsi/Muhabura,rw
