Lionel Messi yatwaye igikombe 5 cy’umukinnyi mwiza ku Isi (Ballon d’or 2015) Ronaldo byanze

Ku nshuro ya gatanu Umunyargentine ukinira ikipe ya FC Barcelona yo muri Espagne, Lionel Messi yegukanye igikombe cy’umukinnyi mwiza kurusha abandi ku Isi mu mupira w’amaguru cyo mu mwaka wa 2015.

Kuri uyu wa Mbere tariki 11 Mutarama 2016 nibwo i Zurich mu Busuwisi hatangiwe uyu mupira wa Zahabu (Ballon d’Or) utangwa n’Ishyirahamwe ry’umupira w’amaguru ku Isi (FIFA) ifatanyije n’ikinyamakuru “France Football”, nk’uko byagaragaraga kuri Televiziyo ya Supersport.


Lionel Messi yarushije amajwi Umunyaportugal Cristiano Ronaldo ukinira Real Madrid umaze kwegukana iki gikombe inshuro eshatu, ndetse n’Umunyabrazil Neymar Jr. utaragitwara na rimwe. Uyu mugabo w’imyaka 28 yegukanye iki gikombe inshuro zikurikirana kuva mu 2009, 2010, 2011 na 2012 none no mu 2015 aragisubiriye, akaba ahize uyu muhigo ko ari we umaze kucyegukana inshuro nyinshi kurusha abandi bose bagitwaye. Umukinnyi w’umwaka mu bagore yabaye Carli Lloyd ukinira Leta Zunze Ubumwe za Amerika iherutse kwegukana igikombe cy’Isi cy’abagore, aho uyu yahigitse Aya Miyama ukinira u Buyapani na Célia Šašić ukinira u Budage

Hatoranyijwe kandi Ikipe y’umwaka y’abakinnyi 11, igizwe na: Manuel Nueur (Bayern Munich/u Budage), Thiago Sylva (PSG/Brazil), Marcelo (Real Madrid/Brazil), Sergio Ramos (Real Madrid/Espagne), Dani Alves (FC Barcelona/Brezil), Andres Iniesta (FC Barcelona/Espagne), Luca Modric (Real Madrid/Croatia), Paul Pogba (Juventus de Turin/u Bufaransa), Neymar Jr (FC Barcelona/Brezil), Lionel Messi (FC Barcelona/Argentine), Cristiano Ronaldo (Real Madrid/Portugal).



Umutoza w’umwaka mu rwego rw’abagabo yabaye Luis Enrique utoza ikipe ya FC Barcelona yo muri Espagne. Naho umutoza w’umwaka mu bagore yabaye Jill Ellis utoza ikipe y’igihugu y’abagore ya Leta Zunze Ubumwe za Amerika. Igitego cyiza mu mwaka wa 2015 ni icyatsinzwe n’umukinnyi Wendell Lira ukinira ikipe yitwa Vila Nova yo muri Brezil.

Kanda hano urebe igitego cy’umwaka wa 2015

Yanditswe na Ubwanditsi/Muhabura.rw