#Kwibuka28 : Bugesera Ntarama: Abaturage basabwe kwirinda ingengabitekerezo ya Jenoside

Kur’uyu wa kane mu gihugu hose hatangijwe iminsi 100 yo kwibuka ku nshuro ya 28 , Jenoside yakorewe abatutsi mu 1994 , mu karere ka Bugesera umurenge wa Ntarama akagali ka Kanzenze mu mudugudu wa Karumuna, abaturage bitabiriye gahunda yo gutangiza icyunamo bahawe ubutumwa butandukanye burimo kwirinda kugira no kugaragaraho ingengabitekerezo  ya Jenoside ahubwo bagaharanira gushyirahamwe nk’abanyarwanda.

Munyankuge Emmanuel n’umwe mubaturage batuye mu mudugudu wa Karumuna akaba ari naho yarokokeye jenoside avuga ko ingengabitekerezo yabibwe n’ubutegetsi bubi ariyo yasenye ubumwe bw’abanyarwanda.

Munyankuge yagize Ati: “Akenshi njya nibaza nimba kiriya gihe imana yari yatsinzwe kugeza abantu batinyuka bakigabaza inzu z’imana bakajya kwicirimo abantu ,ibi byose byatewe n’ingengabitekerezo yari yarabinjiyemo

Col Matungo charles wari waje kwifatanya n’abaturage bo mu kagali ka kanzenze kwibuka ku nshuro ya 28 jenoside yakorewe abatutsi mu 1994 mu butumwa yahaye abaturage yabasabye kwirinda ingengabitekerezo ahubwo bagaharanira kunga ubumwe.

Col Charles Matungo yagize Ati: ” Nta jenoside yashoboka Leta itabigizemo uruhare ,iki n’igihe cyo gufata ingamba zo kurwanya Jenoside n’ivangura iryo ariryo ryose , uyu numwanya wo gusubiza amaso inyuma harebwa icyakorerwa abarokotse jenoside mu rwego rwo kubafasha kwibuka kandi biyubaka.”

Col Charles Matungo  yongeyeho ko uburyo bwo kwibukiranya amateka n’ibihe bikomeye abanyarwanda banyuzemo ari uburyo bwo kurwanya Jenoside
yongeyeho ko ari inshingano z’abanyarwanda bose gukomeza kurwanya abahakana n’abakwirakwiza ingengabitekerezo ya Jenoside

Yagize Ati: Muri ibi bihe byo kwibuka dusabwa gukomeza kuzirikana igihango cy’ubumwe dufitanye nk’abanyarwanda niyo ngabo twikingiza ku bashaka gukomeza kuduca intege no gutambamira intambwe tugezeho mu kubaka igihugu twisangangamo twese nk’abanyarwanda kandi gifite agaciro

Afande Matungo yagize ati “ Turakomeza guha icyubahiro inzirakarengane zishwe zizira ko ari Abatutsi. Turakomeza kandi kuzirikana ububi bwa Jenoside n’ingengabitekerezo yayo, ari nako twiyemeza kuyirwanya buri wese ku giti cye, mu miryango yacu ndetse n’aho tubarizwa hose, haba mu mirimo yacu ya buri munsi ndetse n’aho dutuye.

yavuze kandi ko ari inshingano y’abanyarwanda bose gukomeza kurwanya abahakana n’abakwirakwiza ingengabitekerezo ya Jenoside.

Mu kiganiro yagiranye n’ikinyamakuru Muhabura.rw Umuyobozi w’akarere  ka Bugesera Bwana Mutabazi Richard yavuze ko  mur’iki gihe cyo kwibuka ku nshuro ya 28 Jenoside yakorewe abatutsi mu 1994 , bigendanye n’insanganyamatsiko y’uyu mwaka igira iti: “Twibuke twiyubaka”Abaturage basabwa kwirinda ingengabitekerezo n’ibindi bikorwa bibi bagaharanira ubumwe nk’imwe mu nkingi y’iterambere

Bwana Richard yagize Ati: “Turasaba abaturage kwibuka biyubaka byumwihariko dufasha abacitse ku icumi batishoboye ndetse baharanira gukomeza gusigasira ibyagezweho”.

Ibikorwa byo gutangira icyumweru cy’icyunamo hamwe n’iminsi 100 yo kwibuka ku nshuro ya 28 Jenoside yakorewe abatutsi mu 1994 byabereye ku rwibutso rwa Nyamata ku rwego rw’akarere  ka Bugesera ndetse no hirya no hino mu midugudu aho abaturage bagejejweho ibiganiro byari byateguwe.

Ku rwego rw’ Igihugu Perezida Kagame na Madamu Jeannette Kagame batangije icyumweru cyo Kwibuka ku nshuro ya 28 Jenoside yakorewe Abatutsi, bacana n’urumuri rw’icyizere rugaragaza ubutwari bw’Abanyarwanda mu nzira yo kwiyubaka bava mu mwijima wa Jenoside. Uyu muhango wabereye ku Rwibutso rwa Jenoside rwa Kigali ruri ku Gisozi ruruhukiyemo imibiri ibihumbi 259 yakuwe mu Turere twa Gasabo, Kicukiro na Nyarugenge mu Mujyi wa Kigali.Tariki ya 7 Mata ni Umunsi Mpuzamahanga Ngarukamwaka Isi yose yibukaho Jenoside yakorewe Abatutsi.

Nshimiyimana Emmanuel /Muhabura.rw

Subiza

Email Yawe Ntiribugaragazwe