kwibuka 22: Mu karere ka Rulindo,Uruybyiruko rwasabwe kwirinda ishuri ryo ku mashyiga

Tariki ya 21 Gicurasi 2016, Hibutswe ku nshuro ya 22 Urubyiruko rwishwe muri Jenoside yakorewe Abatutsi muri Mata 1994 rwo mu karere ka Rulindo, Urubyiruko n’abakiri batoya muri aka karere bakaba basabwa kwirinda no kwamaganira kure amashuli yo ku mashyiga ndetse n’abakuru babajya mu matwi babasubiza mu macakubiri yahekuye igihugu cyacu.

Uyu muhango wabereye mu murenge wa Shyorongi ku Rwibutsi rwa Jenoside rwa Rutonde ahashyinguye imibiri 217 y’Abatutsi bazize Jenoside yabakorewe muri Mata 1944. Mu butumwa bwatanzwe n’Umuyobozi w’Akarere wungirije Ushinzwe Imibereho myiza y’Abaturage mu karere ka Rulindo Gasanganwa Marie Claire yagarutse ku babyeyi bananirwa kubwiza abana babo ukuri kw’Ibyabaye mu Rwanda ahubwo bakarangwa no kugoreka amateka maze asaba Urubyiruko n’abana bakiri batoya gufata iyambere mu gusaba ababyeyi babo ubuhamya ndetse no kubabaza amateka yaba ayanditse mu rwego rwo kugirango bayasigasire. Madame Gasanganwa Marie Claire yakomeje agira ati: “Rubyiruko ni mwe mbaraga z’ighugu z’uyu munsi n’ejo hazaza murasabwa kwirinda Ingengabitekerezo ya Jenoside, mukitandukanya n’ababyeyi babi babigisha amacakubiri, mugasoma amateka ya Jenoside mukayasobanukirwa, aho abayeyi banyu bateshutse ntimutinye kubanyomoza no kubabwiza ukuri, inyigisho mbi zo ku mashyiga muakzirwanya mwivuye inyuma”.
Gasanganwa Marie Claire, Visi meya wungirije Ushinzwe Imibereho myiza y’Abaturage muri aka karere ka Rulindo/Photo:Snappy

Madame Gasanganwa yongeyeho kandi ko Jenoside yakozwe n’urubyiruko yica urubyiruko ariko kandi n’ingabo zahagaritse jenoside zari urubyiruko. Bivuze ko icyo urubyiruko rwerekejeho amaboko gikorwa. Murasabwa kurwana ishyaka mugakora ibikorwa byubaka igihugu mukirinda jenoside n’Ingengabitekerezo yayo mukubakira ku bumwe n’ubwiyunge kandi mukimakaza gahunda ya Ndi umunyarwanda.” Umuhango wo kwibuka urubyiruko rwazize Jenoside yakorewe Abatutsi waranzwe n’ubuhamya imivugo by’urubyiruko byose byagaragazaga ububi bwa Jenoside ndetse bagashima Leta y’Ubumwe iyobowe na Perezida Paul Kagame yo yahagaritse Jenoside kandi abarokotse bakaba bakomeje kwitabwaho mu mibereho yabo.

Abanyeshuri n’abarimu bo mu bigo by’amashuri 6 bibarizwa mu murenge wa Shyorongi aribyo (EP Rutonde, ES Rwahi, GS Rwahi, EP Nyundo, EP Muvumo na GS Kijabagwe). Kuri uwo munsi, urubyiruko rwaremeye mugenzi wabo Munyampirwa bamugshyikiriza inka yo korora, ndetse bafasha n’umukecuru wasizwe iheruheru na Jenoside witwa Mukakibibi Epiphanie bamuha ihene yo korora n’ibiribwa. Umuhango washojwe hashyirwa indabo ku rwibutso rwa Rutonde rushyinguyemo imibiri y’abazize Jenoside 617.
Abayobozi mu nzego zitandukanye z’akarere ka Rulindo bari bitabiriye iki gikorwa/Photo:Snappy

Yanditswe na Akayezu Snappy/Muhabura.rw