Israel : Baramagana Leta yatindanye imfashanyo yabemereye muri ’guma mu rugo

Abanya-Israel babarirwa mu bihumbi bari mu myigaragambyo mu murwa mukuru Tel Aviv bamagana icyo bavuga ko ari ingaruka zikomeye z’ubukungu bwifashe nabi zatewe n’uburyo bubi leta iri guhangana n’iki cyorezo cya coronavirus.

Agace ka Rabin Square rwagati muri Tel Aviv kari kakubise kuzuye abigaragambya biganjemo urubyiruko bambaye udupfukamunwa, ariko badakurikiza amabwiriza yo guhana intera.

Bavuga ko ingurane y’amafaranga leta yabemereye muri iki gihe badakora kubera ingamba zo kwirinda coronavirus, yatinze kubageraho.

Iyo myigaragambyo y’ejo ku wa gatandatu yateguwe n’abakora ubucuruzi buciriritse, abikoresha ku giti cyabo ndetse n’amatsinda y’abahanzi.

Benshi bari kugirwaho ingaruka zikomeye kubera ubukungu bwifashe nabi muri iki gihe.

Ndetse barakajwe n’ingamba zo kurwanya coronavirus zatumye uburyo bakuragaho imibereho buhagarara.

Bavuga ko amafaranga y’ingoboka bemerewe na Leta batarayahabwa

Mu gihe abakozi bakorera umushahara hari ubufasha babona ku kazi muri iki gihe badakora, abikoresha ku giti cyabo bo bavuga ko benshi muri bo bamaze amezi bategereje imfashanyo leta yabasezeranyije.

Michal Gaist-Casif, visi-perezida muri kompanyi ikora ibyo gutanga indangururamajwi n’urumuri mu bitaramo, yabwiye ibiro ntaramakuru Reuters ati:”Mfite abakozi 40 badafite ahandi bakura imibereho, nta mafaranga ariho”.

“Ducyeneye ko leta imenamo amafaranga kugeza twongeye gusubira mu bihe bisanzwe by’imikorere”.

“Tumaze igihe tudakora guhera hagati mu kwezi kwa gatatu kugeza mu kwa kane, ukwa gatanu, ukwa gatandatu n’ukwa karindwi, kandi ukwa munani gusa nk’ukuzatubera akaga”.

Abanya-Israel babarirwa mu bihumbi bari mu myigaragambyo mu murwa mukuru Tel Aviv bamagana icyo bavuga ko ari ingaruka zikomeye z’ubukungu bwifashe nabi zatewe n’uburyo bubi leta iri guhangana n’iki cyorezo cya coronavirus.

Ku wa gatanu, Minisitiri w’intebe Benjamin Netanyahu yagiranye inama n’impirimbanyi baganira ku byo binubira.

Ibiro bya Netanyahu byasubiyemo amagambo ye ababwira ati:

“Tuzasohoza ibyo twiyemeje birimo no kwihutisha kuriha aka kanya ibyo dushaka kubaha”.

Hagati mu kwezi kwa gatatu, Israel yashyizeho ingamba zikaze za ’guma mu rugo’, ariko mu mpera y’ukwezi kwa gatanu itangira kuzikuraho. Ubushomeri bwarazamutse bugera ku kigero cya 21%.

Iki gihugu cyagize ukwiyongera gukomeye k’ubwandu bwa coronavirus, ku wa gatanu habonetse abanduye bashya bagera hafi ku 1,500.

Kugeza ubu abantu barenga 38,000 ni bo bamaze gutangazwa ko banduye coronavirus muri Israel, muri bo 358 yarabishe naho abarenga 18,000 barayikize nkuko imibare ya Kaminuza ya Johns Hopkins yo muri Amerika ibigaragaza.

MUHABURA.RW Amakuru Nyayo