Indege z’Amerika zitwaye imfashanyo igenewe Venezuela zageze muri Colombia

Indege za gisirikare za Leta Zunze Ubumwe z’Amerika zikomeje kugeza imfashanyo igenewe Venezuela mu mujyi wa Cucuta wo muri Colombia uri ku mupaka n’iki gihugu.

imfashanyo igenewe Venezuela mu mujyi wa Cucuta wo muri Colombia uri ku mupaka n’iki gihugu.

Iyi mfashanyo iri gutundwa aha ku busabe bwa Juan Guaidó, umukuru w’abatavuga rumwe n’ubutegetsi bwa Venezuela, witangaje ko ari we perezida w’inzibacyuho w’iki gihugu mu kwezi gushize kwa mbere.

Perezida Nicolás Maduro wa Venezuela avuga ko iyi mfashanyo ijyanye n’umugambi mubisha w’Amerika wo kwiyoberanya mu kubona uburyo bwo kugaba igitero muri Venezuela.

Bwana Guaidó yavuze ko abakorerabushake bo muri Venezuela bagera ku bihumbi 600 bazikorera iyi mfashanyo bakayambutsa umupaka bayijyana muri Venezuela, ku itariki ya 23 y’uku kwezi kwa kabiri.

Mu butumwa yatangaje ku rubuga nkoranyambaga rwa Twitter ku wa gatandatu, yagize ati: “Tuzakora ubukangurambaga imbere mu gihugu no hanze yacyo.” Yongeyeho ati: “Urugamba rwacu rukomeje gutanga umusaruro!”

Biracyari urujijo niba iyi mfashanyo izemererwa kwinjira muri Venezuela.

Ubwo yari mu kiganiro n’abanyamakuru mu mujyi wa Cucuta, Mark Green ukora mu kigo cy’Amerika gitanga imfashanyo cya USAID yavuze ko iyi mfashanyo yasabwe na Bwana Guaidó kuko Venezuela yugarijwe n’amakuba.

Yagize ati: “Abana barimo kwicwa n’inzara, kandi hafi ya buri bitaro byo muri Venezuela byugarijwe n’ikibazo cyo kubura imiti“.

Yongeyeho ko ikibazo cya Venezuela kimaze kuba n’icy’akarere iherereyemo, aho Abanya-Venezuela miliyoni eshatu bamaze gusuhukira mu bihugu by’ibituranyi mu gushakayo ibiribwa n’imiti.

Bwana Green yagize ati: “Uyu munsi turi ku rugamba rwa rimwe mu masuhuka manini cyane yabayeho mu mateka y’Amerika y’epfo”.

Uhagarariye Bwana Guaidó yavuze ko hari gushyirwaho n’ahandi hantu ho gukusanyiriza imfashanyo mu bihugu bya Brezili no mu birwa bya Caraïbes (Caribbean).

Yavuze ko hari guteganywa inama n’abategetsi ba Brezili muri iki cyumweru mu kunoza umugambi ujyanye n’ayo makusanyirizo muri leta ya Roraima – imwe mu zigize Brezili – iri ku mupaka na Venezuela.

Yongeyeho ko hari indi mfashanyo iri gukusanyirizwa i Miami muri Amerika ngo yoherezwe ahitwa Curaçao – ubutaka bw’igihugu cy’Ubuholandi buri mu birwa bya Caraïbes – mu cyumweru gitaha.

Bwana Maduro yavuze ko iyi mfashanyo ari igikorwa cyo kwigira mwiza cy’Amerika, ndetse ahakana avuga ko nta makuba ari mu gihugu cye.

Ku wa gatanu, yategetse igisirikare gukomeza kuba maso gikurikiranira hafi icyo yise “imigambi y’intambara” y’Amerika.

Chief editor Muhabura.rw