Ikipe y’igihugu Amavubi ikomeje kwesa imihigo

Ikipe y’igihugu y’umupira w’amaguru Amavubi yazamutse ku rutonde ngarukakwezi rw’Ishyirahamwe ry’umupira w’amaguru ku isi (FIFA) imyanya 6.

Uru rutonde ngarukakwezi FIFA yarutangaje kuri uyu wa gatatu tariki ya 4 Gashyantare 2016. Ubu Amavubi ageze ku mwanya wa 85 avuye ku mwanya wa 91 nk’uko urubuga rwa internet rwa FIFA rubitangaza. Mbere y’irushanwa ry’abakinnyi bakina muri shampiyona yabo ku mugabane w’Afurika (CHAN), Amavubi yanganyije na Cameroun ubusa ku bundi ndetse inatsinda Repubulika Iharanira Demokarasi ya Congo igitego 1-0.

Mu Karere ka Afurika y’u Burasirazuba, ikipe ya Uganda iri ku mwanya wa 70 yasubiye inyuma imyanya 8, Kenya yasubiye inyuma imyanya 2 iri ku mwanya wa 99, Repubulika Iharanira Demokarasi ya Kongo yazamutse imyanya 3 iri ku mwanya wa 57, Tanzania yazamutse umwanya umwe iri ku mwanya wa 125, Ethiopia yasubiye inyuma imyanya 6 ikaba iri ku mwanya wa 124. Uko amakipe akurikirana bihereye ku mwaya wa mbere ku mugabane w’Afurika, Cote d’Ivoire yasubiye inyuma imyanya 9 iri ku mwanya wa 28, Cape Verde yazamutse imyanya 6 iri ku mwanya 33, Algeria yasubiye inyuma imyanya 8 iri ku mwanya wa 36, Ghana yasubiye inyuma imyanya 8 iri ku mwanya wa 41, Senegal yagumye ku mwanya wayo wa 45.

Uko amakipe akurikirana ku rwego rw’Isi kuva ku mwanya wa mbere kugera kuwa 5: Ububirigi, Algentina, Esipanye, Ubudage na Chile. Amakipe atatu ya nyuma anganya amanota ni Djibouti iri ku mwanya wa 204, Eritrea iri ku mwanya wa 204 naho Somalia iri ku mwanya wa 204.

Yanditswe na Ubwanditsi/Muhabura.rw