Ikipe ya APR FC izahagararira u Rwanda mu mikino ya CECAFA Kagame Cup 2021

Kuva taliki 01 kugeza 15 Kanama 2021 mu mujyi wa Dar es Salaam muri Tanzania hazabera irushanwa ry’amakipe yo mu Karere k’Afurika y’Uburasizazuba  “CECAFA Kagame Cup 2021”.

Amakipe 10 ni yo yemeje ko azitabira iri rushanwa. Aya makipe arimo APR FC  yo mu Rwanda yegukanye shampiyona ya 2020-2021 hari kandi  ikipe ya Young Africans SC, Azam FC (Tanzania), Altabara FC (South Sudan), Le Messager Ngozi FC (Burundi), Express FC, KCCA FC (Uganda), Tusker FC (Kenya), KMKM SC (Zanzibar) na Big Bullets FC (Malawi).

Umuyobozi ushinzwe ibikorwa muri CECAFA, Auka Gecheo atangaza ko ku wa Kabiri taliki 27 Nyakanga 2021 ari bwo hazaba tombora y’uko amakipe azahura.

Akomeza avuga ko iri rushanwa rizafasha amakipe yo muri aka karere kwitegura neza imikino y’Afurika ya 2021-2022  izatangira muri Nzeri 2021.

Iri rushanwa riterwa inkunga na Perezida w’u Rwanda, Paul Kagame ryaherukaga kuba muri 2019 ubwo ryaberaga mu Rwanda  ikipe ya KCCA FC yo muri Uganda yegukanye igikombe  itsinze ku mukino wa nyuma Azam FC yo muri Tanzania igitego 1-0. Muri 2020 iri rushanwa nta bwo ryabaye kubera COVID-19.

•