Ambasade ya Leta zunze ubumwe za Amerika muri Tanzania yatangaje ko ibyago byo kwandura coronavirus mu mujyi wa Dar es Salaam “biri hejuru cyane”.
Mu itangazo riburira ku buzima, iyi ambasade ivuga ko hari ukwiyongera kwihuse kw’iki cyorezo muri Dar es Salaam, umurwa mukuru w’ubukungu, no mu bindi bice by’igihugu.
Leta ya Tanzania ntacyo iratangaza ku bivugwa na ambasade ya Amerika muri iki gihugu.
Iyi ambasade ivuga ko ibitaro byinshi byo muri Dar es Salaam byuzuriranye muri ibi byumweru bishize.
Ivuga ko kubera ubushobozi bucye mu by’ubuvuzi mu gihugu abarwayi batinda kubona ubuvuzi bigashyira ubuzima bwabo mu kaga.
Umujyanama ushinzwe ibibazo rusange muri iyi ambasade, BBC yamubajije ibimenyetso bashingiraho bemeza ibi ntiyabitanga, asaba ko ibya Covid-19 bibazwa minisiteri y’ubuzima ya Tanzania.
Ubu hashize ibyumweru bibiri leta ya Tanzania idatanga amakuru mashya ku buryo iki cyorezo kifashe mu gihugu.
Ni nyuma y’uko Perezida Magufuli avuze ko ibikoresho byifashishwa mu gupima Covid-19 – bivanwa hanze – bidakora neza ndetse agafunga laboratoire y’igihugu ngo habe iperereza.
Imibare iheruka gutangazwa tariki 29 z’ukwezi gushize, muri Tanzania hari abantu 509 banduye Covid-19, abayikize 183 na 21 yishe.
Abatavuga rumwe n’ubutegetsi banenga leta guhisha no guhakana amakuru kuri iki cyorezo, ibirego abategetsi bo bavuga ko bidafite ishingiro.
Minisitiri w’ububanyi n’amahanga Prof Palamagamba Kabudi aheruka kwemeza ko “Tanzania itishyize ukwa yonyine mu kurwanya Covid-19” nk’uko bamwe babiyirega.
Denis Fabrice Nsengumuremyi/ MUHABURA.RW
