Covid-19: Nta myaka ijana Imvugo nkizo zavamo ibintu bikomeye-CP John Bosco Kabera

Umuvugizi wa Polisi y’u Rwanda, CP John Bosco Kabera, mu kiganiro n’abanyamakuru cyabaye kuri uyu wa Gatatu cyari kigamije gusobanura ingamba zafashwe z’Inama y’Abaminisitiri kuri uyu wa Kabiri zijyanye no kwirinda COVID-19, yagaragaje zimwe mu mbogamizi zishobora kuba intandaro mu kwirinda icyo cyorezo, asaba Abanyarwanda kutadohoka kuko COVID-19 igihari.

CP Kabera yavuze ko hashize iminsi abaturarwanda baradohotse ku mabwiriza yo kwirinda COVID-19, ibintu bishobora guha icyuho ubwiyongere bw’icyorezo.

Yavuze ko hari imvugo ziriho zishobora kototera kwirinda abantu bakaba bacika intege mu kwirinda bigaha icyuho COVID-19.

Ati “Hariho abakoresha imvugo ngo ‘Mbere ya COVID-19’, nk’aho yarangiye, ‘Mpobera twarikingije cyangwa twipimishije’, ‘Kuramo agapfukamunwa nkurebe neza’, ‘Wambaye neza ariko ni uko wambaye agapfukamunwa’, ‘Nta myaka ijana’. Imvugo nk’izo abantu batazitondeye bakazinjirana mu minsi mikuru zavamo ibintu bikomeye.”

Ku birebana n’abantu bakira abantu benshi babagana nko mu mahoteli, resitora, ndetse n’ahakirirwa abantu uko iminsi ishira batagenzura iyubahirizwa ndetse ntibakurikize neza ry’amabwiriza yo kwirinda COVID-19.

Ati: “Usanga abakozi batipimisha COVID-19 nk’uko bisabwa n’amabwiriza, badapima umuriro w’abakiliya babo mu buryo buhoraho nk’uko bisabwa ndetse rimwe na rimwe ugasanga abakozi cyangwa n’ababagana batambara agapfukamunwa ku buryo bukwiriye. Ibi byose bakabikora  birengagiza  bagamije kugumana abakiliya.

Bazagumana bate abakiliya batagenzura ko bubahiriza amabwiriza yo kwirinda COVID-19? Igihe se abo bakiliya barwaye COVID-19, uzakira abahe bakiliya kwakira iki cyangwa aho ukorera nihafungwa bizagenda gute?”

Yabasabye kongera imbaraga mu gukurikirana iyubahirizwa ry’amabwiriza yo kwirinda aho bakorera.

Mu nsengero naho hagaragara kudohoka atanga ingero mu kudohoka, aho hari aho batacyandika abaje gusenga, abaririmbyi bakuramo udupfukamunwa, kudahana intera ndetse no kudakoresha ikoranabuhanga mu gutura nk’uko bikubiye mu mabwirizaya Minisitiri w’Ubutegetsi bw’Igihugu.

Polisi irasaba hoteli zagenewe kwakira abaturuka mu mahanga  yuko babitaho ku buryo budasubirwaho mu gihe bagitegereje ibipimo byo kwipimisha COVID-19 kuko kuba bavamo bitazwi bakaba bajya mu bandi baturage cyangwa mu zindi ngendo mu buryo batabona ibisubizo byabo. Hoteli rero zifite inshingano zikomeye.

Ibitaramo by’umuziki no kubyina byafunzwe, ariko ku bitaramo byari byateguwe byuvikane ko ibizakorwa ari ibifite uruhushya.

Abakozi bo mu nzego za Leta batanga serivisi hazakora 30% naho mu bikorera bazakora batarenza 50% kandi bagakurikiza amabwiriza yose yo kwirinda COVID-19.

Ntitwavuga ko abantu bakwiye kwirinda gusa muri iyi minsi isoza umwaka ahubwo hagomba kwirindwa n’andi makosa yose yo mu muhanda yateza impanuka zigahitana ubuzima bw’abantu.

Hari ikintu kimaze kugaragara kimaze gufata intera yabatwara ibinyabiziga banyweye ibisindisha.

Yagize ati: “Mu kwezi kwa Mutarama hafashwe abantu 172 ariko mu kwezi k’Ugushyingo dusoje hafashwe 384 mu mezi 11, Polisi yafashe 2923. Guhera taliki ya 5 Ukuboza kugeza taliki 14, Polisi yafashe abantu 59.295 batambaye udupfukamunwa, 7089 bafashwe barenze ku masaha y’ingendo, mu gihe 1,081 bafashwe banywera inzoga mu tubari tutemerewe gukora.”

Abaturarwanda bose bakaba basabwa gushyira mu bikorwa amabwiriza mashya yatangajwe yo kwirinda COVID-19.