Coronavirus: Abantu batandatu barashwe bari mu birori mu bihe bidasanzwe muri California

Muri Amerika Polisi ya leta ya California yatangaje ko harashwe abantu batandatu bagakomereka ubwo bari mu birori birimo abantu benshi mu gihe hari amategeko ko abantu baguma mu ngo zabo mu kwirinda ikwirakwira rya coronavirus.

Aba bantu barashwe kuwa gatandatu nijoro ubwo bari mu birori ku nzu zo guturamo (apartment) ahitwa Bakersfield.

Abarashwe ni abagore bane, umugabo umwe n’umukobwa umwe – bakaba baravuwe ibikomere bidakomeye cyane.

Nta muntu wafashwe ngo afungwe, gusa abagabo bane babonywe bahunga n’imodoka bikekwa ko ari bo bakoze iki gitero.

Hari gukorwa iperereza nk’uko polisi yaho ibitangaza

Mu kwezi gushize, muri leta ya California hashyizweho amabwiriza abuza abantu kuva mu ngo zabo.

Iyi ni imwe muri leta zibasiwe cyane na coronavirus muri Amerika aho abantu barenga 21,000 bayanduye naho 651 ikaba imaze kubahitana.

Mu mategeko mashya, abatuye muri iyi leta bemerewe gusohoka gusa bagiye guhaha, kwivuza, gukora siporo cyangwa kugendesha imbwa zabo n’amaguru.

Ibikorwa byose byarafunzwe hemererwa ibikenerwa cyane nk’ubucuruzi bw’ibiribwa, ubw’imiti n’abacuruza ibitoro.

Niyomugabo Albert/MUHABURA.RW