Burundi: Domitien Ndayizeye ’wangiwe kwitoza’ avuga ko bitaca intege Abarundi

Mu bakandida bari bifuje guhatanira guteguka u Burundi, komisiyo ishinzwe amatora ejo yemereye batandatu naho bane barangirwa, Domitien Ndayizeye avuga ko yatangajwe cyane no kuba yarankiwe kandi yahise ajya kubaza impamvu.

Mu bifuza guhatanira uwo mwanya, Ndayizeye ari mu bazwi cyane bashobora guhabwa amahirwe kuko yabaye perezida w’iki gihugu (2003 – 2005) na visi perezida wacyo(2001 – 2003).

Komisiyo ishinzwe amatora ejo yatangaje ko bane mu bari bifuje kuba abakandida batujuje bimwe mu bisabwa, Ndayizeye kimwe muri byo nicyo atari yujuje; abamuhagarariye (parrains) 200.

Ndayizeye yatanzwe nk’umukandida n’ihuriro ry’amashyaka ya politiki ryitwa Kira – Burundi ngo ariserukire mu matora ateganyijwe mu kwezi kwa gatanu.

Yagize ati: “Naragiye kuri CENI ndababaza bambwira ko babaze (baharuye) bakabona 159 aho kuba 200 basabwa.

“Njyewe byaranyobeye kuko abo dukorana bambwiye ko batanze 208, ndabibasobanurira nabo barambwira ngo bazi kubara, mbabwira ko nanjye n’abo dukorana tuzi kubara. Ni aho urubanza ruri”.

Bwana Ndayizeye avuga ko umuntu yakwibaza uko yabura abantu 200 mu gihe ngo niyo bamusaba abantu 10,000 bamuhagarariye yababona mu masaha macye.

Ati: “Wowe waza kwitoza kuba umukuru w’igihugu utaronka abantu 200 ukabona imiriyoni eshatu gute?”

Ndayizeye afite iminsi ibiri yo kujuririra iki cyemezo cya komisiyo y’amatora mu rukiko (sentare) rurengera itegeko nshinga, akavuga ko ari buregere uru rukiko uyu munsi cyangwa ejo.

Biteganywa n’itegeko ry’amatora ko uru rukiko rusubiza ku kirego nk’iki rwashyikirijwe mu minsi umunani.

Ndayizeye avuga ko yizeye ko uru rukiko rutazamurenganya, gusa ko bene ibi byamubayeho bisubiza inyuma umwanya wo kwitegura, abigereranya n’impanuka yo mu muhanda.

Ati: “Navuga ko ibi byabaye bitaca intege Abarundi n’abandi bose bari biteze ’candidature’ yanjye, igikuru ni uko bashigikira urunani rwanshyize imbere, nk’uko banabivuga mu kirundi ’imitwe ikora ikoranye’”.

Niyomugabo Arlbert |MUHABURA.RW