APR FC yatsinze Gicumbi FC ikomeza kuyobora urutonde rwa shampiyona
Mu mpera z’icyumweru gishize taliki 12 na 13 Gashyantare 2022 hakinwe imikino y’umunsi wa 16 ya shampiyona y’icyiciro cya mbere mu bagabo “Primus National League 2021-2022”. Ikipe ya APR FC yitwaye neza itsinda Gicumbi FC ikomeza kuyobora urutonde rw’agateganyo.
Iyi kipe yasoje imikino ibanza iyoboye, yatangiye neza imikino yo kwishyura aho yatsinze ikipe ya Gicumbi FC ibitego 2-0, umukino wabereye kuri Sitade ya Gicumbi. Ibi byatumye APR FC ikomeza kuyobora urutonde n’amanota 37.
Indi mikino yabaye, ikipe ya Gasogi United yatsinze Marines FC ibitego 3-2, Kiyovu itsinda Gorilla FC ibitego 2-1, Mukura itsinda Rayon Sports igitego 1-0, AS Kigali itsinda Espoir FC ibitego 4-0, Etincelles FC itsinda Rutsiro FC ibitego 2-0, Bugesera FC inganya na Musanze FC 0-0 naho Police FC itsinda Etoile de l’Est FC ibitego 6-0.
Nyuma y’iyi mikino y’umunsi wa 16, ikipe ya APR FC irayoboye n’amanota 37 ikurikiwe na Kiyovu ifite amanota 32, AS Kigali ku mwanya wa 3 n’amanota 27, ku mwanya wa 4 hari Mukura, ku mwanya wa 5 hari Police FC, Rayon Sports ikaba iri ku mwanya wa 6, zose zifite amanota 26. Ikipe ya Musanze FC iri ku mwanya wa 7 n’amanota 24, Marines FC (21), Gasogi United (19), Bugesera FC (18), Espoir FC (18), Rutsiro FC (16), Etoile de l’Est FC (16), Etincelles FC (14) Gicumbi FC (12) na Gorilla FC (11).
Imikino y’umunsi wa 17 biteganyijwe ko izakinwa taliki 16 na 17 Gashyantare 2021.