Algeria yemeje ikoreshwa rya chloroquine mu kuvura Covid-19 ’ku barwayi bamwe na bamwe’

Minisiteri y’ubuzima muri Algeria yatangaje ko ibitaro byo muri iki gihugu cyo mu majyaruguru y’Afurika bishobora gukoresha chloroquine mu kuvura abarwayi ba Covid-19.

Ariko iryo tangazo risobanura neza ko uwo muti ukwiye gukoreshwa mu kuvura “abarwayi bamwe na bamwe” b’iyo ndwara y’ubuhemekero iterwa na virus ya Covid-19. Rivuga kandi ko bigomba gukurikiza “amabwiriza yabugenewe mu by’ubuvuzi”.

Chloroquine ni umwe mu miti yakoreshejwe igihe kirekire mu kuvura malariya – nubwo henshi muri Afurika utagikoreshwa kubera ko yawurushije ubukana.

Mu kuvura abarwayi ba malariya, ibyo binini bikoreshwa mu kugabanya umuriro no kubabuka (inflammation).

Ishami ry’umuryango w’abibumbye ryita ku buzima (OMS/WHO) rivuga ko kugeza ubu nta gihamya ntakuka iriho ko chloroquine ivura Covid-19.

Ariko OMS yongeraho ko ari umwe mu yindi irimo gukorwaho amagerageza ngo harebwe niba wayivura.

James Gallagher, umunyamakuru wa BBC ukurikiranira hafi inkuru z’ubuzima, agira ati:

“Chloroquine isa nkaho ihagarika coronavirus mu bushakashatsi bwo muri za ’laboratoires’. Hari ibimenyetso by’ibivugwa n’abaganga bavuga ko yagaragaye nk’ifasha”.

Mu cyumweru gishize, hari urujijo rwo kumenya niba Leta Zunze Ubumwe z’Amerika zemeje uwo muti nk’uvura coronavirus.

Ariko urwego rushinzwe ubuziranenge bw’ibiribwa n’imiti muri icyo gihugu rwavuze ko ucyigwaho.

Abantu 17 bamaze kwicwa na Covid-19 muri Algeria, igihugu kugeza ubu gifite abanduye 230, 54% byabo bakaba bari mu ntara ya Blida iri mu majyepfo y’umurwa mukuru Alger.

Mu cyumweru gishize, leta yafunze imipaka yose, ica ingendo z’indege n’iz’ubwato ndetse n’ingendo zihuza imijyi itandukanye y’icyo gihugu.

Algeria kandi yasabye abakozi bangana na 50% by’abakozi bose kuba bagiye mu kiruhuko cy’ibyumweru bibiri – ariko ikazabibahembera, ibategeka kuguma mu ngo zabo.

Abakora ubucuruzi ku giti cyabo basezeranyijwe ko bazahabwa inkunga y’amafaranga yo kuriha igihombo batewe no kuriha imishahara abakozi babo muri iki gihe batari ku kazi.

Mu bihugu bituranyi bya Maroc na Tunisia, nabyo byahagaritse ubuzima busanzwe, abasirikare bagabwe mu gufasha iyubahirizwa ry’amabwiriza yo kutegerana.

Barimo kandi kugenzura niba koko amaduka n’ibikorwa by’ubucuruzi bufatwa nkaho atari ubwa ngombwa cyane byafunzwe, nkuko byategetswe.

Denis Fabrice Nsengumuremyi/ MUHABURA.RW