Akanama k’amatora ka Kongo katangaje urutonde ntakuka rw’abakandida-Perezida

Akanama k’amatora muri Repubulika ya Demokarasi ya Kongo ku wa gatatu katangaje urutonde ntakuka rw’abakandida-perezida mu matora ateganyijwe mu kwezi kwa cumi na kabiri uyu mwaka – urutonde rutariho abakinda babiri batavuga rumwe n’ubutegetsi bazwi cyane.

Corneille Nangaa, umukuru w’aka kanama k’amatora, yagize ati “Ubu noneho twarangije icyiciro cy’amakandidatire, ubu twerekeje mu cyiciro kijyanye n’amatora yo ku itariki ya 23 y’ukwezi kwa cumi na kabiri.”

Nkuko bitangazwa n’ibiro ntaramakuru AFP, abarenga 20 bari bagejeje kandidatire zabo ku kanama k’amatora ka Kongo.

Urutonde ntakuka rwatangajwe n’aka kanama k’amatora ruriho abakandida-perezida 21.

Mu bagaragaye ku rutonde ntakuka rw’abakandida-perezida, barimo Félix Tshisekedi, Vital Kamerhe, na Emmanuel Ramazani Shadary wahoze ari minisitiri w’ubutegetsi bw’igihugu akaba anashyigikiwe na Perezida Kabila.

Ariko kandi uru rutonde ntakuka rwemeje ko abarimo Jean-Pierre Bemba wahoze ari umukuru w’inyeshyamba akaza no kuba visi-perezida w’iki gihugu batemerewe kwiyamamaza, cyo kimwe na Moïse Katumbi wahoze ari umukuru w’intara ya Katanga.

Bwana Bemba yamaganye aya matora ya perezida yimirije yise “ikinamico.”

Iki gihugu cyahoze cyitwa Zaïre, ntikirigera kigira ihinduka ry’ubutegetsi riciye mu mahoro kuva cyabona ubwigenge mu mwaka wa 1960.

Urutonde ntakuka rwatangajwe ruriho abakandida-perezida 21

MBA MALUTA JOSEPH,TSHIANI KABAMBA MWADIAMVITA NOËL,MABAYA GIZI AMINE,KIN-KIEY MULUMBA,MATUNGULU MBUYAMU ILNAKIR FREDDY,TSHISEKEDI TSHILOMBO FELIX, SHEKOMBA OKENDE ALAIN DANIEL,RADJABHO TEBABHO SOBORABO,KAMERHE LWA KANYIGINYI NKINGI VITAL,FAYULU MADIDI MARTIN,MPUNGA MBOMBA YVES,MOKIA MANDEMBO GABRIEL,MASHEKE NGERAKUEYI SYVAIN MAURICE,RAMAZANI SHADARY EMMANUEL, LUNTADILA DIAVENA CHARLES, MVEMBA FRANCIS, SAMY BADIBANGA, MARIE JOSÉ IFOKU,SETH KIKUNI, KAZADI LUKONDA NGUBE-NGUBE,NGOY ILUNGA WA SENGA THÉODORE

Salongo richard