Abanyamakuru bane bakatiwe gufungwa imyaka ibiri n’amezi atandatu

Abanyamakuru bane b’ikinyamakuru kigenga Iwacu bakatiwe n’urukiko rukuru rwa Bubanza mu Burundi gufungwa imyaka ibiri n’amezi atandatu banacibwa ihazabu ya miliyoni imwe y’amarundi buri umwe, naho umushoferi wabo yagizwe umwere.

Me Clement Retirakiza, umwunganizi w’aba banyamakuru yavuze ko Gahuzamiryango ko batunguwe n’icyemezo cy’urukiko.

Térence Mpozenzi, Agnès Ndirubusa, Egide Harerimana, Christine Kamikazi n’umushoferi wabo Adolphe Masabarakiza, bashinjwa “ubufatanyacyaha mu guhungabanya umutekano w’igihugu”.

Aba bafashwe mu kwezi kwa cumi bagiye gutaara inkuru y’igitero cy’inyeshyamba mu burengerazuba bw’u Burundi bahakanye ibyo baregwa bavuga ko bafashwe bari mu kazi kabo.

Me Retirakiza avuga ko ntacyo yavuga ku byemezo by’uru rukiko rwa Bubanza kuko atarabona inyandiko y’urubanza ngo amenye ingingo bashingiyeho babakatira icyo gifungo.

Avuga ko mu iburanisha batanze ibimenyetso byose bigaragaza ko nta cyaha aba banyamakuru bakoze kuko bari mu kazi kabo.

Me Retirakiza avuga ko uko byagenda kose bazajuririrauyu mwanzuro w’urukiko kuko bumva udakwiriye.

Mu kwezi kwa 11 Antoine Kaburahe yari yari yavuze ko aba banyamakuru nta kidasanzwe bakoze uretse kujya gutara inkuru aho yabereye nk’uko bikorwa mu mwuga wabo.

Umushinjacyaha mukuru w’u Burundi yavuze ko aba banyamakuru badafunze kubera umwuga wabo ahubwo bafunze kubera ibyaha baregwa.

Mu byumweru bibiri bishize, inteko ishinga amategeko y’ubumwe bw’uburayi yamaganye “Gutera ubwoba, guhohotera no gufunga nta cyaha kigaragara abanyamakuru, abaharanira agateka n’abanyapolitike batavuga rumwe na leta mu Burundi.”

Kuri ibi, Willy Nyamitwe umujyanama wa Perezida Petero Nkurunziza, yanditse kuri Twitter ko “iyo nteko icyeka ko u Burundi bukiri igihugu gikoronijwe n’ibihugu by’iburayi”.

MUHABURA.RW