Abanduye Coronavirus ku Isi barenze miriyoni 3, abakize barasatira miriyoni

Imibare itangazwa n’inzego z’ubuzima ku rwego mpuzamahanga iragaragaza ko abanduye icyorezo cya Koronavirusi (COVID-19) ku Isi bamaze kugera kuri 3,004,892, barimo abagera ku 883,008 bakize.

Muri abo batahuwe ku Isi hamaze gupfamo abantu 207,262. Ikinyamakuru Financial Times cyatangaje ko imibare y’abadatangazwa ko bishwe na COVID-19 ishobora kuba irenze itangazwa ku kigero cya 60% nyuma y’ubushakashatsi cyakoze mu bihugu 14.

Imibare yerekanye ko muri ibyo bihugu habonetsemo abarenga ibihumbi 122 bishwe n’icyo cyorezo mu gihe abatangajwe ari ibihumbi 77 gusa.

Kudatangaza imibare y’ukuri mu bihugu byakozwemo ubushakashatsi biramutse bikorwa ku Isi hose, umubare w’abatangazwa ko bapfuye wava ku bihumbi 200 ukarenga ibihumbi 310.

Denis Fabrice Nsengumuremyi/ MUHABURA.RW