Leta y’u Rwanda irishimira intambwe imaze guterwa

Leta y’u Rwanda irishimira intambwe imaze guterwa mu wifashisha ikoranabuhanga mu mitangire ya serivisi, aho ubuzima bugenda bworohera abaturage mu nzego zitandukanye babikesha ikoranabuhanga. U Rwanda rw’uyu munsi rwarushijeho kwegerana Isi yose, no kugaragara cyane mu ruhando mpuzamahanga, kubera uruhare rw’ikoranabuhanga. 

Mu myaka 27 ishize u Rwanda ruvuye mu mateka mabi ya Jenoside yakorewe Abatutsi, ikoranabuhanga ryagize uruhare rukomeye mu rugendo rwo kwiyubaka no kubaka isura nshya mu ruhango mpuzamahanga. Kuri ubu ikoranabuhanga ntirigifatwa nk’irigenewe abakire, ryabaye uburenganzira bwa buri wese mu rugendo rw’iterambere ritagira n’umwe risigaza inyuma.

“Ntawushobora guhakana umusaruro mwiza ryatugejejeho”, nk’uko byashimangiwe na Minisitiri w’Intebe w’u Rwanda Dr. Ngirente Edouard kuri uyu wa Gatatu taliki ya 21 Nyakanga 2021, ubwo yafunguraga ku mugaragaro Inama ya 41 y’Abayobozi b’Imijyi bibumbiye mu Ishyirahamwe ry’Abayobozi b’Imijyi ikoresha ururimi rw’Igifaransa (AIMF).

Iyi nama iteraniye mu Rwanda kuva ku Cyumweru taliki ya 18 ikazageza ku ya 22 Nyakanga, ihurije hamwe abasaga 200 barimo abayobozi b’imijyi ihuriye muri iryo shyirahamwe n’abandi bayobozi bo mu nzego zitandukanye za Leta n’iz’abikorera.

Muri iyi nama haraganirwa ku ngingo zitandukanye zirimo ubufatanye bw’imijyi mu guteza imbere urwego rw’ubuzima n’imibereho myiza y’abaturage, uburinganire bw’abagore n’abagabo, no kwimakaza demokarasi.

Minisitiri w’Intebe Dr. Ngirente, yashimangiye ko kwifashisha ikoranabuhanga byoroshya umubano wambukiranya imipaka y’ibihugu ndetse n’uwabaturage by’umwihariko.

Yagaragaje ingero z’uburyo iryo koranabuhanga ryagize uruhare rukomeye mu gufasha abaturarwanda kubonera serivisi z’imisoro kuri murandasi, kubona ibyangombwa by’ubwubatsi, ibyangombwa by’imitungo yabo, ndetse n’ibyemezo bitandukanye bitangwa na Leta bikaba bisabwa hifashishijwe iryo koranabuhanga.

Yagaragaje kandi uburyo ikoranbuhanga ryihutisha imitangire ya serivisi za Leta kandi zigatangwa mu buryo buzira amakemwa, hagamijwe kwihutisha iterambere ry’ubukungu n’imibereho myiza y’abaturage.

Kubera icyorezo cya COVID-19, ikoranabuhanga ryarushijeho kugaragaza uburyo rikenewe kurushaho kuko ibisubizo ryatanze ndetse n’udushya twagiye duhangwa turishingiyeho ni byo byatumye ubuzima bukomeze no mu gihe abantu basabwa gukorera mu rugo, kwigira kuri murandasi n’ibindi.

Yagize ati: “Kugira ngo ubukungu bw’ibihugu byacu bujyanye n’ikoranabuhanga, ntidukwiye kubaka ibikorwa remezo by’ikoranabuhanga gusa, ahubwo dukwiye no guharanira ko abantu bagera ku bikoresho by’ikoranabuhanga nka mudasobwa na telefoni zigezweho (smart phones).”

Yakomeje agira ati: “Uyu munsi uruhare rwa sosiyete sivile muri serivisi zitangwa mu mijyi rurigaragaza mu nzego zitandukanye. Urwo ruhare rwabo rufasha imijyi gushyiraho ibisubizo bikwiye bijyanye n’ibyo abaturage baba biteze. Mu Rwanda sosiyete sivile ibonwa nk’umufatanyabikorwa w’ingenzi wa Leta kuko igira uruhare mu kugera ku ntego z’iterambere. Ni imwe mu nkingi z’imiyoborere myiza y’Igihugu.”

Yakomeje ashimangira ko ubuhahirare bwambukiranya imipaka bugira uruhare rukomeye mu iterambere ry’imijyi, ari na yo mpamvu ikoranabuhanga ryoroshya ubwo buhahirane ari ingenzi mu kugabanya ikiguzi mu bucuruzi no koroshya ihererekanywa ry’ibicuruzwa na serivisi.

Yashimangiye ko ubutwererane bw’imijyi mu bya dipolomasi bugira uruhare rukomeye mu gushaka ibisubizo byoroshya imibanire ya sosiyete, gukumira no gukemura amakimbirane no kwiyubaka nyuma y’amakimbirane hagamijwe kubaka umutekano n’iterambere.

Yashimangiye ko ikoranabuhanga u Rwanda rushyiramo ingufu rigamije gufasha muri urwo rugendo ruganisha ku iterambere rishingiye ku bufatanye mpuzamahanga.

Minisitiri w’Intebe Dr. Ngirente, yanakomoje ku ruhare rw’ikoranabuhanga mu mikorere myiza y’Isoko Rusange ry’Afurika (AfCFTA) ryatangiye gukora muri uyu mwaka nyuma y’amasezerano yasinyiwe i Kigali muri Werurwe 2018, rikaba ryitezweho guhuza abasaga miliyari 1.27 ku mugabane w’Afurika.

Yahamagariye abayobozi b’imijyi ikoresha ururimi rw’Igifaransa n’abagize sosiyete sivile bitabiriye inama kongera imbaraga mu gushyigikira gahunda zimakaza ubufatanye mu nzego zose ndetse no gushyira imbere ikoranabuhanga muri gahunda zose zigamije iterambere ry’imijyi, asoza yizeza uruhare n’ubushake bya Leta y’u Rwanda mu gushyigikita gahunda zose za AIMF.

Subiza

Email Yawe Ntiribugaragazwe