Irushanwa ry’umupira w’amaguru rihuza ibihugu byo muri Amerika ubu nta gihugu rifite kizaryakira

Irushanwa ry’uyu mwaka ry’umupira w’amaguru rihuza ibihugu byo muri Amerika y’epfo ubu ryasigaye nta gihugu rifite kizaryakira habura ibyumweru bibiri ngo ritangire, nyuma yuko Argentina iryatswe.

Mbere, byari biteganyijwe ko Argentina ifatanya na Colombia kuryakira, ariko Colombia ku itariki ya 20 y’uku kwezi kwa gatanu ikurwa ku kuryakira kubera imyigaragambyo mu gihugu.

None ubu impuzamashyirahamwe y’umupira w’amaguru muri Amerika y’epfo (CONMEBOL) yavuze ko Argentina na yo yatswe kuryakira kubera “uko ibintu bimeze ubu”.

Iki gihugu gihanganye n’ubwiyongere bw’ubwandu bwa Covid-19.

Muri guverinoma ya Argentina no hanze yayo, hari habayeho kwiyongera kw’abamagana ko iri rushanwa ribera muri icyo gihugu.

Ku wa gatanu rutahizamu w’ikipe y’igihugu ya Uruguay Luis Suarez yabwiye abanyamakuru ko hagomba gushyirwa imbere “ubuzima bw’abantu”.

Impuzamashyirahamwe CONMEBOL yavuze ko ubu irimo “gusesengura ubusabe bw’ibindi bihugu” byagaragaje ubushake bwo kwakira iri rushanwa rya Copa America ryitabirwa n’amakipe y’ibihugu 10.

Riteganyijwe kuba guhera ku itariki ya 13 y’ukwezi kwa gatandatu kugeza ku itariki ya 10 y’ukwezi kwa karindwi.

Biteganyijwe ko kuri uyu wa mbere haba inama y’iyo mpuzamashyirahamwe igamije gufata icyemezo ku kigiye gukurikiraho kijyanye n’iryo rushanwa, ritabaye mu 2020 kubera icyorezo cya coronavirus.

Brazil ni yo ifite igikombe giheruka, yegukanye mu 2019.

Subiza

Email Yawe Ntiribugaragazwe