Rwanda: Minisiteri y’Ubuzima yakwirakwije inkingo za Covid-19 hirya no hino mu gihugu

Kuri uyu wa Gatanu nibwo Minisiteri y’Ubuzima yakwirakwije inkingo za Covid-19 hirya no hino mu gihugu, izigera ku 247000 nizo zagejejwe mu Ntara hirya no hino mu gihugu.

Gahunda yo gutanga izo nkingo ku baturage bari barahawe icyiciro cya mbere cy’inkingo za AstraZeneca kiratangira kuri uyu wa Gatandatu.

U Rwanda ruherutse kwakira doze ibihumbi 247000 z’urukingi rwa AstraZeneca, binyuze mu bufatanye bw’ibihugu bugamije gukwirakwiza inkingo za covid19 ku isi Covax.

Kuri uyu wa gatanu nibwo zatangiye koherezwa hirya no hino mu gihugu mu bitaro mu turere, mu gihe habura amasaha macye ngo gahunda yo gukingira abaturage hirya no hino mu gihugu itangire.

Mu gikorwa cyo gukwirakwiza izi nkingo, indege za kajugujugu z’ingabo z’u Rwanda nizo zifashishijwe mu kuzigeza  mu ntara zose z’igihugu kugirango zikwirakwizwe mu bitaro n’ibigo nderabuzima bizatangirwamo.

Bamwe mu bayobozi b’ibitaro n’abo uturere izi nkingo zagejejejwemo, bavuga ko biteguye bihagije guhita bakingira abari babonye doze ya mbere.

Bamwe mu bahawe doze ya mbere y’uru rukingo,  bavuga ko n’ubwo igihe bari bahawe cyo gukingirwaho doze ya kabiri cyari  cyararenze, ngo bashimishijwe no kuba bagiye guhabwa doze ya kabiri.

Gakunde Felix wahawe doze ya mbere, avuga ko yizeye ko uru rukingo ruzongera ubudahangarwa bw’umubiri we, mu rwego rwo gukomeza guhangana n’icyorezo cya covid-19.

Taliki ya 5 Werurwe uyu mwaka nibwo u Rwanda rwatangiye igikorwa cyo gukingira covid 19 hifashshijwe inkingo zo mu bwoko bwa Pfizer na AstraZeneca.

Doze ya mbere y’urukingo rwa AstraZeneca yari yahawe abasaga 290,000  kuri doze ibihumbi 247000 zahawe u  Rwanda, zirimo 117,600 zatanzwe n’igihugu cy’Ubufaransa.

Subiza

Email Yawe Ntiribugaragazwe