Ikipe y’u Rwanda inzozi zayo zirangiriye kuri Cameroun

Kuri  uyu wa Kabiri taliki 30 Werurwe 2021 ni bwo hasojwe imikino yo gushaka itike y’imikino y’Afurika “CAN 2021” izabera muri Cameroun umwaka utaha wa 2022.

Ikipe y’u Rwanda “ Amavubi”  yari iri mu itsinda F yagiye gukina umukino usoza  mu  itsinda ifite amahirwe yo kuba yabona itike n’ubwo byasabaga imibare myinshi irimo gutsinda Cameroun iwayo   naho Mozambique igatsinda Cap Vert.

Uyu mukino w’ ikipe y’u Rwanda na Cameroun wabereye kuri Sitade Japoma i Douala warangiye izi kipe zombi zinganyije 0-0.  Ku ruhande rw’u Rwanda, abakinnyi basoje umukino  ari 10 nyuma y’aho umunyezamu Kwizera Olivier  aherewe ikarita y’umutuku ku munota wa 54.

Ku rundi ruhande, ikipe ya Cap Vert yatsindiye Mozambique iwayo igitego 1-0  cyabonetse ku munota wa 58 aho umukinnyi wa Mozambique, Faisal Bangal yitsinze.

Nyuma y’iyi mikino, Cameroun izakira irushanwa yazamutse iyoboye itsinda  n’amanota 11 ikurikirwa na Cap Vert n’amanota 10 akaba ari nazo kipe zahise zibona itike ya CAN 2021. Ikipe y’u Rwanda “Amavubi”  yasoreje ku mwanya wa 3 n’amanota 6 naho Mozambique isoreza ku mwanya wa 4 wa nyuma n’amanota 4.

Ikipe y’u Rwanda mu rugendo rwo gushaka itike ya CAN 2021  yatangiye nabi itsindwa imikino ibiri ya mbere harimo umukino wa Mozambique yatsinzwe ibitego 2-0 ndetse n’uwa  Cameroun yatsinzwe igitego 1-0. Nyuma indi mikino  yihagazeho aho  yanganyije na Cap Vert imikino ibiri 0-0, itsinda Mozambique igitego 1-0 isoza inganya  na Cameoun 0-0.  Ikipe y’u Rwanda mu mikino 6 yabashije kwinjiza igitego 1 yinjizwa ibitego 3.

Amakipe 24 azakina CAN 2021

Aya makipe ni Cameroun izakira irushanwa, Senegal, Algeria, Mali, Tunisia, Burkina Faso, Guinea, Comoros, Gabon, Gambia, Misiri, Ghana, Guinea Equatorial, Zimbabwe, Ivory Coast, Morocco, Nigeria, Sudan, Malawi, Ethiopia, Mauritania, Guinea-Bissau na Cap Vert.

Ikipe y’igihugu ya Comoros na Gambia ni inshuro ya mbere zigiye kwitabira imikino ya CAN. Ikipe y’igihugu ya Malawi ni yo  yongeye kubona itike yari imaze igihe kinini ititabira kuko yaherukaga muri 2010 hakaba hari hashize imyaka 11.

Misiri ni yo kipe y’igihugu imaze kwitabira  inshuro nyinshi (25)  ikaba ari nayo ifite iki gikombe inshuro nyinshi (7). Ikipe ya Algeria ni yo iheruka kwegukana igikombe cy’Afurika “CAN 2019”, irushanwa rikaba ryari ryabereye mu Misiri.

CAN 2021 igiye kuba ku nshuro ya 33  yagombaga gukinwa uyu mwaka wa 2021 ariko kubera COVID-19 yatumye imikino ihagarara, imikino yimuriwe muri Mutarama na Gashyantare 2022.

Subiza

Email Yawe Ntiribugaragazwe