Rwamagana:Abamugariye Ku Rugamba barasaba ko n’imiryango yabo yajya ihabwa Mituweli

Abamugariye ku rugamba rwo kubohora igihugu bo mu karere ka Rwamagana bavuga ko nubwo bishyurirwa ubwisungane mu kwivuza ariko bagifite imbogamizi zo kwishyurira imiryango yabo ubwisungane ndetse no kubona amafaranga yo kwishyurira abana babo amashuri bityo bagasaba ko bafashwa ibyo bibazo bafite bigakemuka.

Aba bamugariye ku rugamba rwo kubohora igihugu,bashima ko ku ruhande rwabo batangirwa ubwisungane mu kwivuza ariko bakagaragaza ko bafite imbogamizi z’uko batabona ubushobozi bwo kwishyurira imiryango yabo.

Bavuga ko atari ibyo gusa kuko no kubona amafaranga yo kwishyurira abana babo amashuri nabyo biba ari ingorabahizi.

Ritararenga Francois ufite abana bane harimo abiga mu mu ishuri ryisumbuye ndetse n’abandi biga muri kaminuza,avuga ko bimugora kubona ubwisungane mu kwivuza ku muryango we ndetse no kubona amafaranga yo kurihirira abo bana biga.

Ati”Amafaranga y’ishuri biba bihenze uhereye mu mashuri y’incuke kugera muri kaminuza ubwishyu bwayo buba bugoye.Ubwisungane na none nitwe bishyurira umuntu ku giti cye,ugasanga rero imiryango yacu kuko ari migari hari izo mbogamizi zo kugira ngo ya mafaranga aboneke usanga ni imbogamizi zikomeye ni zindi nshingano ziba ziri mu rugo”.

Ritararenga akomeza agira ati”Turasaba ubufasha n’ubufatanye kugira ngo izo nzego zombi ari izirebana n’uburezi ndetse na mitiweli,ibyo babe babidufashamo.

Mugenzi we avuga ko nubwo bahabwa ubwisungane mu kwivuza babuha umuntu umwe ibintu abona ko Ari imbogamizi.

Ati”Hari imbogamizi zikomeye kubera ko bajya baduha mitiweli ariko bayiha umuntu umwe ku giti cye.Ibaze nawe mu rugo rwose kuba baha mitiweli umuntu umwe wenyine abandi bose bagasigara ntayo bafite izo ni imbogamizi zikomeye”.

Aba bamugariye ku rugamba rwo kubohora igihugu barasaba ko bafashwa kugira ngo imiryango yabo nayo yishyurirwe ubwisungane mu kwivuza ndetse no gufasha abana babo kubona amafaranga y’ishuri.

Umuyobozi w’akarere ka Rwamagana, Mbonyumvunyi Radjabu, avuga ko iki kibazo cy’ubwisungane ku miryango y’abamugariye ku rugamba ndetse n’icy’uko abana babo batabona amafaranga y’ishuri,ibyo byose iyo bigaragajwe bibonerwa umuti dore ko n’impamvu zo kuba badafite ubushobozi izwi.

Ati”Iyo bagize imbogamizi uretse baba bandi bari muri za koperative zatewe inkunga bafite uburyo bwo kwibeshaho,ariko abandi turabafasha kimwe n’uko dufasha abandi banyarwanda bagaragaza amikoro make n’ubukene.Ariko aba ngaba biba ari n’umwihariko kuko ubukene cyangwa kudakora biba bifite n’impamvu zigaragara zabiteye.Nta n’umwe rero ujya urembera mu rugo cyangwa ngo agire ingorane zo kuba umwana atakiga kandi duhari nk’ubuyobozi.Iyo hari uwugize icyo kibazo turagikemura”.

Ubusanzwe abamugariye ku rugamba mu karere ka Rwamagana bahabwa ubufasha burimo ibyo kurya,ibikoresho by’isuku ndetse n’ibikoresho by’abanyeshuri.Bakaba bifuza ko ubwo bufasha bwakongerwaho kwishyurira imiryango yabo ubwisungane mu kwivuza ndetse no gufasha abana babo kubona amafaranga y’ishuri cyane cyane ku biga mu mashuri yisumbuye na kaminuza.

Subiza

Email Yawe Ntiribugaragazwe