Perezida Kagame yashimiye ikipe y’Igihugu Amavubi uburyo yitwaye muri Cameroun

Perezida Kagame, yasuye Ikipe y’Igihugu ‘Amavubi’ Kuri iki Cyumweru ayishimira uburyo yitwaye muri Shampiyona Nyafurika ihuza abakinnyi bakina imbere mu bihugu byabo muri Cameroun.

Perezida Kagame yashimiye Amavubi uburyo yitwaye mu irushanwa nyamara yariteguye mu bihe bikomeye bya COVID-19, avuga ko hari ishimwe bagenewe n’Igihugu ryiyongera ku duhimbazamusyi bahawe.

Perezida Kagame yagize Ati “Twari twavuganye na Minisitiri wa Siporo, tuvugana na Leta, turavuga ngo reka abakinnyi b’ikipe yacu, abatoza n’abandi babafasha mu bintu bitandukanye by’ingenzi bya ngombwa na byo, hari ibyo numvise FIFA igenera amakipe bidasobanutse cyane, ariko ubu biragenda bijya mu buryo, nari nasabye ko natwe nka Leta, twashaka icyo tubagenera kirenze kuri icyo.

“Ibyo Minisitiri arabibagezaho, no mu mikoro make yacu nk’Igihugu, ntabwo tubura bike dushobora gushimira abantu tukagira icyo tubaha, tugakomeza tugatera imbere.”

Ndongera kubashimira ko mwifashe neza, abantu bose barabikurikiye, kuba mutarageze mu mikino ya nyuma cyangwa ku gikombe, iyo ni yo yari intego, ariko ubwo buryo mwagiyemo, uko byagenze, abantu bose bashima ko mwakoze neza, mukomereze aho. Ntimutezuke, ntimusubire inyuma, mukomeze gutera imbere.”

Mbere yo guhura na Guinea, Amavubi yari yemerewe miliyoni 3 Frw mu gihe kugera muri ¼ byahesheje buri umwe wari ugize iyi Kipe y’Igihugu kubona miliyoni 5 Frw.

Ikipe y’Igihugu yasezerewe nyuma yo gutsindwa na Guinea igitego 1-0 muri ¼ cya CHAN 2020, yagarutse mu Rwanda ku wa Gatatu mu ijoro.

Subiza

Email Yawe Ntiribugaragazwe